New Delhi, Nailar:
U Myntri Rangbahduh Narendra Modi hynnin ka sngi u la mih ban leit jngoh na ka bynta ar sngi sha South Africa ban ïa don bynta ha ka 15th BRICS Summit kaba la sdang hynnin ka sngi. Kane ka jingïalang ka long kaba shongkun ba ka BRICS ka la long ka rynsan na ka bynta ban ïakren bad ïaphylliew jingmut halor ki mat kiba ïadei bad ki ri kiba shah kynthup hapoh kane ka kynhun.
Kane ka dei ka sien kaba nyngkong ba ki nongmihkhmat kin ïakynduh markhmat ha ka BRICS Summit kiba kynthup ïa ka ri Brazil, Russia, India, China, bad South Africa, naduh u snem 2019.
Da kane ka jingïakynduh jong kine ki ri la buh jingthmu ba lah ban pyntreikam ïa ki lad ki lynti na ka bynta kine ki ri bad ban ithuh ïa ki lad ki lynti ha kaba ïadei bad ka jingïatreilang hapdeng jong ki nangne shakhmat.
Ha ka 23 tarik, Nailar, kata mynta ka sngi, u Modi un sa ïashim bynta ha kiba bun ki prokram. Khatduh ha ka sngi kaba bud, kata ha ka 24 tarik, un sa ïashim bynta ha ka bynta kaba kyrpang ka “BRICS – Africa Outreach and BRICS Plus Dialogue”, ka ban sa pynlong hadien ka jingïalang, ka ban kynthup ïa kiwei pat ki ri kiba la shah wer sngewbha ha ka South Africa.
