Pune, Nailar:
U Myntri jong ka seng NCP, u Dilip Walse-Patil ha ka Lah Sngi U Blei u la pynpaw ïa ka jingsngewskhem ban neh ka kynhun nongïalam jong u Sharad Pawar. Kane ka la paw shi sngi hadien ba u la ong ba u nongseng jong ka seng un ym lah shuh ban pynïoh ïa ka jingbun paid na ka bynta ban thaw sorkar.
Naba u la shah kynthoh jur halor katei ka jingkren jong u ïa u heh nongïalam jong ka seng NCP u Sharad Pawar, u Dilip Walse-Patil, ïa uba la leit ban pynïasoh bad ka sorkar hapoh ka jingïalam jong u Eknath Shinde ha Maharashtra ha ryngkat u Ajit Pawar ha u bnai ba la lah, u la pynshisha ba ka jingkren jong u, kaba la paw ha ka jingïalang paidbah kaba la long ha Pune distrik, ka dei ka bym lah ban sngewthuh shai da ki nongthoh khubor halor kane ka bynta.
Ha ka jingai jingkren sha ki nongbud jong ka seng ha Manchar ha ka Assembly konstitwensi jong u ha Ambegaon, u Walse-Patil u la ong ba ki briew jong ka Maharashtra kim ju ai ha ki kti jong u Sharad Pawar ïa ka bor ne ban ailad ïa u ba un thaw khlem nongïarap ïa ka sorkar.
U Walse-Patil, u la ong. “Nga sngew ba ki lad phah khubor ki la sngewthuh bakla. Ngam shym la kren sniew ei ei shaphang u Pawar. Nga pynpaw ka jingsngewsih ba kiwei pat ki seng riewlum ki ïoh ïa ka bor synshar dalade, ki briew jong ka Maharashtra kim shym ai ïa ka sha u. Kam shym don kano kano ka jingkylli jong ka jingkren pyrshah ïa u Pawar ne buh jingkylli halor ki jingleh jingkam jong u.”
“Wat lada u la long u nongïalam uba paw, ki briew jong ka Maharashtra kim shym don sha ka liang jong u na ka bynta ban ai ka jingkyrshan kaba pura. Nga pynpaw ïa ka jingbym sngewtynnat jong nga halor kane. Kane kam shym dei ka sien kaba nyngkong ba ngan kren shaphang kata. Nga la kren ruh ïa kane ha ki por ba la leit ruh, kynthup ha ki jingïalang jong ka seng. Ka long kaba eh ban pynshisha ba nga kren pyrshah ïa u Pawar. Nga pynpaw ka jingsngewsih halor ka jingsngewthuh bakla,” u la ong.
