Hyderabad, Nailar:
U President jong ka seng BRS bad u Myntri Rangbah jong ka Telangana u K Chandrasekhar Rao ha ka Lah Sngi U Blei u la pynbna ïa ka thup kyrteng jong ki kyrtong na ka bynta ki 115 na ki 119 tylli ki konstitwensi na ka bynta ka jingïakhun ïa ka ilekshon Assembly ka ban sa long mynta u snem.
U Rao, ïa uba la tip ruh da baroh kum u KCR, un sa ïakhun ïa ka ilekshon na Gajwel bad Kamareddy konstitwensi. U KCR u la ong ba ïa ki kyrtong la pynkylla tang ha ki 7 tylli ki konstitwensi. U heh jong ka seng BRS u la ong ruh ba ka seng kan sa pyllait ïa ki mat treikam ha ka 16 tarik, Risaw ha Warangal.
“Ka seng BRS kan sa jop hapdeng ki 95-105 tylli ki konstitwensi,” u la ong, ha kaba u la bynrap shuh shuh da kaba ong ba ka jingïalong paralok hapdeng u MP jong ka Hyderabad ha Lok Sabha u Asaduddin Owaisi uba la lamkhmat ïa ka seng AIMIM kan sa ïai bteng. U MP jong ka Rajya Sabha u Kapil Sibal ha ka lah sngi U Blei u la thalaiñ tyngeh ïa u Myntri ka sorkar kmie uba dei khmih ïa ka tnat ki kam pohïing u Amit Shah halor ka jingkren jong u ha kaba ïadei bad ka jingong ba ka sorkar BJP ka la buh ïa u mawnongrim na ka bynta ban pynlong ïa ka jylla Madhya Pradesh ka jylla ka ban lah ban ïeng hala kijong ki kjat.
