Chandigarh, Nailar:
Ka sorkar Punjab ka la ong ba ka la dep ban pyllait ïa ka pisa kaba T. 186.12 klur kum ka bailutksan halor ki jingthung jingtep kiba la shah pynjulor ha ki thaiñ ba la shah ktah jur na ka jingshlei um ha ka jylla.
U Myntri jong ka Revenue, Rehabilitation and Disaster Management u Bram Shanker Jimpa u la ong ba ïa kane ka pisa la dep ban pyllait na ka pisa ba la mang na ka bynta ban ai jingïarap sha ki Deputy Commissioner jong baroh 16 tylli ki distrik.
Ki jingthung jingtep ki la shah pynjulor bun namar ka jingshlei um ha kiba bun ki thaiñ jong ka jylla ha u Naitung bad u Nailar, la ong u Myntri ha ka jingthoh kaba u la phah.
Ka la don ka jingleit jurip kaba kyrpang ïa kaba la tip kum ka ‘girdawari ba la pynlong ha baroh ki thaiñ kiba la shah ktah jur, u la bynrap.
Ka sorkar jylla ka la don bynta na ka bynta ban pynbiang ka bai lutksan sha ki lanot bad ka la ïaleh ban pynbiang ïa ka pisa ban ai jingïarap na ka bynta kane, la ong u Myntri.
Kum ka jingpynbiang ïa man ki distrik kiba la shah ktah jur, u la ong ba T. 59.50 klur la pyllait sha Patiala, T. 26.52 klur sha Tarn Taran, T. 26.08 klur sha Sangrur, T. 22.44 klur sha Ferozepur bad T. 12.92 klur sha Mansa.
U Myntri Rangbah jong ka jylla u Bhagwant Mann u la dep ban pynbna ba ka jingduhnong halor ki jait jingthung bapher bapher, ki jingri ne ki ïing la kynthup lang ha ka por ba la don ka jingleit jurip bniah ha kaba ïa kine la kheiñlang bad ai ka jingïarap pisa sha ki briew, la bynrap u Jimpa.
