New Delhi, Nailar:
Kumba la sakhi, la ong ba ka la long ka jingjia kaba ishyrkhei haduh katta katta ha kaba ïadei bad ka jingtwa khyndew ha Kullu distrik kaba don ha Himachal Pradesh hynnin ka sngi ha kaba ka la pynkhyllem ïa kiba bun tylli ki ïing kiba don bun mala ha kaba la ngeit ba kane ka jingjia ka jingtwa ka la tep ïa bun bun ngut ki briew.
Kumba la ïohi na ka Video la shem ba ki la don bun tylli ki ïing kiba don bun mala ki la khyllem lut, ha kaba la ïohi ïa ka jinglynguh pum-pum kaba shyrkhei na ka jingtwa kine ki ïing.
Ki kynhun pyllait im kum ka National Disaster Response Force (NDRF) bad State Disaster Response Force (SDRF), ki la shah pyntreikam ha katei ka jaka ha kaba la ngeit ba ki la don bun ngut ki briew kiba la shah tep hapoh ka jingtwa.
Ka Indian Meteorological Department (IMD) ka la pynmih ïa ka hukum ba ki briew ha kane ka thaiñ ki la dei ban kynriah jaka namar ka jingjur palat jong u ‘lapbah lapsan ha Himachal Pradesh na ka bynta ar sngi, ïa kaba la sdang naduh hynnin ka sngi.
“Katkum ka jingïohi na ka Video kaba la ktah bad ishyrkhei shisha, la ong ba ka jaka kaba la jia ka dei na Anni, Kullu, ha kaba ka jingtwa ka khyndew na ka ranab lum ka la pynkyllem lut ïa kiba bun tylli ki ïing bun mala.
