Dehradun, Nailar:
U Myntri Rangbah jong ka Uttarakhand u Pushkar Singh Dhami u la ong ba ki jinglong jingman kumba ka paw ha ka jylla na ka daw jong ka jingwan hap jong u slap uba jur ka la wanrah ka jingduhnong kaba khraw ha kaba ka la long da palat T. 1,000 klur.
“Ka jingwan hap jong u slap uba jur ha kane ka aïom Lyiur ka la pynjulor bun ïa ki jingthung jingtep, ka la rat naphang ïa ki surok, ki jingkieng, ki ïing bad ki sem jong ki jingri jingdup bad ruh ka la shim ïa ka jingim jong kiba bun ki briew bad ki jingri. Ki jingdon jingem kiba la kot sha palat T. 1,000 klur ki la julor ba duh lut bad ka jinghap jong u slap ka dang ïai bteng,” la ong u Dhami ha ka jingïakren bad ki nongthoh khubor hadien ba la don ka jingïakren bad ïaphylliew jingmut halor ki jinglong jingman hapoh ka jylla na ka jingwan hap jong u slap.
U la ong ruh ba shen yn sa pyntreikam ïa ka skhim ban wanrah da ka sorkar jylla na ka bynta ban ai jaka sah shipor ïa ki briew kiba la shah ktah jur bad ban ai ki jingsumar ïa ki khynnah kiba la duh noh ïa ki kmie ki kpa jong ki na kiba bun ki daw kiba la mih na ka jingjur slap ha Uttarakhand.
Ka kynhun na ka sorkar kmie ka la dep ban pynlong lypa ïa ka jingleit jurip bniah bad kan sa ai ïa ka jingbatai kaba bniah ha kaba ïadei bad ka jingmang jingïarap halor ka jingduhnong ba la long na ka jingshah thombor ha ki bor ka mariang, la ong u Dhami.
Kum shi bynta ban ai jubab halor ka jingkylli ha kaba ïadei bad ka jingnang bun jong ka jingleit jong ki nongjngohkai pyrthei ha ki nongbah jong ka Uttarakhand, u la ong ba ki heh ba dei khmih halor ki jingshah pynjulor kiba mih na ki jingthombor jong ki bor ka mariang ki la dep ban khmih bniah ïa ki jaka sor kiba don bun ki nongjngohkai pyrthei.
