Chandigarh, Nailar:
Ki shipai ïada khappud ki la nang bteng ban pynjur ïa ka jingpahara ha ki bynta khappud kum shi bynta ban khanglad ïa ki bar ri ba kin wan ban khaïi ïa u drok bad kiwei pat ki jingdih pynbuaid sha kane ka ri. Kane ka la long shi sngi hadien ba ka kynhun ba ju ïakhun pyrshah ïa u drok ka Special Task Force (STF) jong ki pulit ka Punjab ki la pynpulom ïa ka jingthmu khaïi ïa u drok da kawei ka kynhun da kaba kem ïa ki lai ngut ki dkhot jong ka ha ka shnong Mehimad Mandra kaba don ha Amritsar distrik ha ka sngi Balang.
Ki pulit ki la ïoh ban kurup kumba 41kg u Heroin ba la khaïi da ki na Pakistan lyngba ka wah Ravi. Ïa kine kiba la shah kynnoh la tip kyrteng kum u Agyapal Singh, 27 snem, jong ka shnong Ghumrai, u Ranjodh Singh, ba la tip ruh da ka kyrteng kum u Rana, 26 snem, jong ka Mehimad Mandra, bad u Sandeep Singh jong ka shnong Panjgrain kaba don ha Amritsar distrik. Ha kaba ïadei bad ka jingai jingkren ha ka jingïalang bad ki nongthoh khubor ha Amritsar, u Assistant Inspector General (AIG), STF, u Mukhtiar Rai u la ong, “Ka kynhun jong ngi ba la lamkhmat da u Deputy Superintendent of Police (DSP) u Vawinder Mahajan ka la pynlong ïa ka jingpyntreikam na ka bynta ban pyntroiñ ïa kane ka kynhun jong ki nongkhaïi drok kiba la treikam da ka jingïarap jong ki nongshong shnong jong ki nong Pakistan na ka bynta ban khaïi ïa u Heroin na ki bynta khappud.”
Ha ka por ba la don ka jingpyntreikam, la ïoh jingtip ba u Agyapal, uba long u snar nongïalam jong ka kynhun ki nongkhaïi drok, ha ryngkat arngut kiwei pat ki nongïarap ki la ïoh ïa ki song jong u Heroin na Pakistan, ha kaba la buh ha ka shnong Mehimad Mandra.
