Mumbai, Nailar:
U nongseng jong ka Nationalist Congress Party (NCP) u Sharad Pawar, ha kaba ka seng jong u ka la shah ktah jur na ka jingïapait kaba la long ha u Naitung ha Maharashtra, un sa ai jingkren ha ka jingïalang paidbah ka ban long ha Kolhapur ha ka sngi Thohdieng, kata mynta ka sngi, kaba long shi taïew shwa ka jingpynlong ïa ka jingïalang jong ka kynhun ka liang pyrshah ka INDIA ha Mumbai, la ïathuh ka kynhun jong ka seng jong u.
Naduh ka jingpynibor pyrshah u pyrsa jong u u Ajit Pawar, uba la leit ban pynïasoh bad ka sorkar BJP bad ka Shiv Sena ha u bnai ba la lah bad ïohlong Symbud Myntri Rangbah, u nongïalam jong ka seng NCP u la pynlong ïa ki jingïalang paidbah ha kiba bun ki bynta jong ka jylla.
U la ai jingkren ha ka jingïalang paidbah kaba la long ha ka 17 tarik, Nailar ha Beed distrik, kaba long ka shnong jong u nongïalam ka seng NCP jong ka kynhun u Ajit Pawar bad u Myntri jong ka Cabinet u Dhananjay Munde.
Ha ka jingïakren bad ki nongthoh khubor, u nongaiktien jong ka seng NCP kaba dei ka kynhun jong u Sharad Pawar u Mahesh Tapase u la ong,
“U Sharad Pawar un sa ai jingkren ha ka jingïalang paidbah ka ban la long ha Kolhapur ha ka sngi Thohdieng kata ha ka 25 tarik, Nailar. Un sa ai jingkren ruh ha Jalgaon bad Pune distrik.”
Na ka liang jong u nongaiktien jong ka seng haduh mynta um pat ïathuh ïa ki tarik na ka bynta ban pynlong ïa ki jingïalang paidbah ki ban pynlong ha kine ki ar jaka kata ha Jalgaon bad Pune distrik.
