Mumbai, Nailar:
Ki la don kumba 30 ngut ki khynnah jong ka skul Ashram ha Bhandara distrik jong ka bynta ba shaphang Mihngi jong ka Maharashtra kiba la shah pynkit sha Hospital hadien ba la suba ba ki la ngat bih na ka jingbam, la ïathuh u heh pulit hynnin ka sngi.
Kane ka jingjia ka la jia ha Yerali Ashram School kaba don ha ka jaka sor ha Tumsar ha ka sngi Palei, u la ïathuh. Ha ka jingïakren bad ki nongthoh khubor, u ophisar jong ka tnat ka koit ka khiah ha Bhandara distrik u Milind Somkuwar u la ong, “Ki la don kumba katto katne ngut ki khynnah jong ka skul Ashram kiba la ud shitom bad don na ki kiba la prie bad shitom kpoh bad don ruh kiba la ïoh ïa ka jingshit met ha ka sngi Palei, ha kaba hadien kane, ka kynhun jong ka tnat ka koit ka khiah jong ka distrik ki la khmih bniah halor ka jinglong ka koit ka khiah jong ki 325 ngut ki khynnah kiba sah ha ka Hostel jong ka skul.”
Na kine ki khynnah ki la don kumba 30 ngut kiba la shah sumar ha Sub-district Hospital ha Tumsar, u la ong. ” Ngi la suba ba ka la dei na ka daw jong ka jinglong bih jong ka jingbam naba ki khynnah ki la shitom hadien ba la dep ban bam ïa ka jingbam ba la sam sha ki ha ka Hostel,” u la ong, ha kaba u la bynrap shuh shuh da kaba ong ba baroh ki khynnah mynta ki la kham koit bad shen kin sa shah pyllait noh.
