Kochi, Nailar:
Ka kynhun Enforcement Directorate (ED) ka la bthah ïa u nongïalam jong ka seng CPIM bad u Myntri Rangbah barim jong ka Kerala u A C Moideen ba un leit mih na ka bynta ka jingtohkit ka ban long ha ka 31 tarik, Nailar ha ka jaka treikam jong ka kaba don ha Kochi ha kaba ïadei bad ka jingshah kynnoh donkti ha ka jingkamai ïa ka spah bymhok kaba ïadei bad ka kam bamsap kaba la mih na ka ram (loan) na Karuvanannur Service Co-operative Bank.
Ka kynhun ED ka la phah jingthoh na ka jaka treikam kaba ha Kochi hynnin ka sngi sha u Moideen, u MLA na Kunnamkulam, kaba la long shi sngi hadien ka jingïoh ban kurup ïa kumba 36 tylli ki jingdon jingem kiba la kot sha ka T. 15 klur, kynthup ïa T. 28 lak ka pisa ha ki Fixed Deposit ha ka kyrteng jong u Moideen bad ka kurim jong u.
Ka kynhun ED ka la phah ruh ka shithi sha ki saw ngut kiba la ïasuhbuit lang bad u Moideen ha ka jingjia, ha kaba la hukum ïa ki ba ki la dei ban leit mih sha ka jaka treikam jong ka kynhun ha Kochi na ka bynta ban kylli jingkylli ha ka 31 tarik, Nailar.
Kane ka kam bamsap ka la paw pyrthei, hadien ba ki la don bun ngut ki nongthep pisa kiba la mudui halor ka ram ba la phah sha ki briew ki bym shym la lah ban ithuh da kaba pyndonkam pat da ki kyrteng jong ki. Hadien ba la pynlong ïa ka jingtohkit, la shem ba T.150 klur tyngka ka pisa ka dei kaba la shu sei tuh da ka lynti kaba beaiñ.
