Ranchi, Nailar:
U Myntri Rangbah jong ka Jharkhand u Hemant Soren u la buh ka jingmudui ha ka Supreme Court pyrshah ïa ka jingkhot hajir jong ka kynhun Enforcement Directorate’s (ED) ïa u halor ka jingjia jong ka jingkamai ïa ka spah bymhok.
U Hemant Soren, um shym la leit mih na ka bynta ka jingshah khot hajir kaba ar ha ka kynhun Enforcement Directorate (ED) na ka bynta ban kylli jingkylli halor ka jingjia ba ïadei bad ka jingkamai ïa ka spah bymhok halor ka jingdie jaka ha ka nongbah Ranchi. Ïa ka rai jong u Myntri Rangbah la ïakren lyngba u dkhot jong ka seng ha jaka treikam jong ka kynhun ED ha katei ka thaiñ, naba u dang bteng ïa ka kam jong u ha State Secretariat.
U heh sorkar u la ong ba u Myntri Rangbah u la kyntait ban leit mih hakhmat ka kynhun tohkit, ha kaba la ong ba u la phah ka jingmudui ha kaba ïadei bad kane. Ka kynhun Enforcement Directorate hashwa ka la khot hajir ïa u Soren na ka bynta ban pynlong ka jingtohkit ha ka 14 tarik, Nailar, hynrei u la kyntiat halor kane bad u la ong ba u dang bunkam ha kaba ïadei bad ki kam saiñ pyrthei.
