Mumbai, Nailar:
Ki pulit jong ka Mumbai hynnin ka sngi ki la ïohpdiang ïa ka khubor thok na uwei u khynnah uba dang 10 snem ka rta, halor ka jingdon bom ha ka liengsuiñ ha Chhatrapati Shivaji Maharaj International Airport.
Ïa kane ka Call la ïohpdiang da ka Control Room jong ki pulit ka Mumbai ha ka Emergency Number 112. U nongphah khubor, u la ong ba ïa u bom la buh ha ka liengsuiñ kaba la dei ban mih noh hadien 10 kynta, la ïathuh u heh pulit. Hadien ba la ïohpdiang ïa kane ka khubor, ki pulit khlem da pynslem ki la sdang ïa ka jingpyntreikam bad lap hadien ba kane ka khubor ka dei kaba shu thok.
“U khynnah uba dang 10 snem u la phah ïa kane ka khubor na Satara,” la ïathuh u heh pulit. Kane ka khubor ka la wan shi bnai hadien ba ki pulit ka Mumbai ki la shah byrngem thombor kumba la jia ha ka 26 tarik, Naiwieng jong u snem 2008.
U briew u bym shym la lah ban ithuh u la byrngem thombor ïa u Myntri Rangbahduh u Narendra Modi bad ïa u Myntri Rangbah jong ka Uttar Pradesh u Yogi Adityanath, ha kaba ka la don ka jingpynkhlaiñ ïa ka jingpahara, la ïathuh u heh pulit. Ha kaba ïadei bad kane ka jingjia, la pynngat hapoh ka kyndon 509 (2) jong ka Indian Penal Code pyrshah ïa u nongphah khubor pyntriem bad ka jingtohkit halor ka jingjia ka dang ïai bteng.
