Chennai, Nailar:
U Myntri Rangbah jong ka Tamil Nadu u MK Stalin ha ka Sngi Ba-ar u la dep ban pynbna ïa ka song tyngka kaba T. 10 klur na ka bynta ban sam kum ka jingai jingïarap halor ka jingshah ktah jur jong ka Himachal Pradesh na ka jinghap jong u slap uba jur.
Ha ka shithi ba la phah sha u Myntri Rangbah jong ka Himachal Pradesh u Sukhvinder Singh Sukhu, u Stalin u la ong ba u la dap da ka jingsngewsih halor ka jingjur jong ka jingduhnong bad ki jingshah ktah jur ha kane ka jylla na ka daw jong ka jinghap u slap bad ki jingtwa khyndew ha kiba bun ki jaka.
“Nga pynpaw ka jingsngewlem na ka bynta baroh kito kiba la shah ktah jur na ki jingjia ba la wan na ki jinglynshop ki bor ka mariang, ka sorkar TN ka la noh synñiang kumba T. 10 klur na ka bynta ka jingthmu ban pynbha bad maramot ïa ki jingjulor ha ka jylla jong phi. Da ka jingsngewrit to pdiang ïa ka.”
Kum shi bynta ban tyrwa shuh shuh ka jingïarap na ka liang jong ka sorkar bad ki briew jong ka Tamil Nadu, u Stalin u la ong, “Lada don kaei kaei kaba ngi lah ban ïarap na ka bynta ki jingmaramot ne pynbha, sngewbha wat ym buhrieh hynrei da pyntip ïa nga kumba ka long.”
Kumba la ïathuh ka tyllong khubor, la ong ba u Sukhvinder Singh u la ïakren bad u Stalin lyngba ka Phone bad u la batai shai sha u ha kaba ïadei bad ki jingjulor kiba bun ïa kiba la wanrah da u slap uba jur bad kiwei pat ki jingjia bad batai halor ki jingdonkam jong ka sorkar.
