New Delhi, Nailar:
Ka jingjia shah thombor ha ki lehnoh ha Pulwama ha u snem 2019 ha kaba ki la don kumba 40 ngut ki shipai kiba la ïap ka la pynlong ïa ka sorkar jong u Modi ba kan sloit noh ïa ka Article 370, la ong ka sorkar kmie ha ka Supreme Court ha ka Lah Sngi U Blei, la ïathuh ka tyllong khubor.
U Solicitor General Tushar Mehta, uba la ïatai nia bad ka sorkar kmie, u la ong, “Ki la don shibun kiei kiei kiba la jia…ka jingjia ha Pulwama ka la jia ha basdang u snem 2019 bad kane ka la wanrah ha ki jingmut jingpyrkhat na ka bynta ban pynïoh ïa ka shongsuk-shongsaiñ, bad shibun ki mat ba ïadei bad ka jingbuh jingshngaiñ ïa ka ri.” “Ar tylli ki seng saiñ pyrthei kiba kham pawkhmat, kata ka seng NC bad PDP ki la pynibor halor kane ka rai ha kaba ïadei bad ka jingduh jong ki nong Kashmir ïa ka jinglaitluid bad ka jingsynshar hi.
“Ka jingshisha ka long ba ki nongshong shnong jong ka Jammu & Kashmir kim shym ïoh pura ïa ka hok tynrai, ki jingdon jingem, ki jaka sah bad ki kam hapoh ka jingdon jong ka jingphiah kaba shipor jong ki nongshong shnong bad kiwei pat na ka bynta ban ïoh ïa ka hok tynrai,” la bynrap u SG Mehta.
Ym slem hadien ka jingshah jied biang ha ka sien kaba ar da kaba ïoh shibun ka jingkyrshan ha u Jymmang jong u snem 2019, u Myntri Rangbahduh u Narendra Modi bad ka sorkar jong u ka la sloit noh ïa ka Article 370 bad ka Article 35A ha kaba kane ka la wanrah ïa ka jingkylla ha ka saiñ pyrthei, ha kaba ka la lah ban pynurlong ïa ka jingkular jong ka seng Bharatiya Janata Party (BJP) kaba la shiphew snem.
Ka Article 370 ka ailad ïa ka Jammu & Kashmir ba kan don ïala kajong ka Riti synshar, ka lama bad ka hok ban wanrah ïa ki aiñ ki kanun lait noh ki bynta kiba ïadei bad ka ri.
Ka Article 35A ka ailad ïa ki nongsynshar jong ka Jammu & Kashmir ba kin jied ïa ki trai nongshong shnong jong ka jylla bad kumjuh ruh ban pynbiang ïa ka bhah ba kyrpang bad ban pynïoh ïa ki hok longbriew man briew sha ki trai nongshong shnong, lyngba ka hukum jong u ne ka President.
