Thane, Nailar:
Katkum ka jingïathuh jong ki pulit hynnin ka sngi, la ong ba kawei ka kynhun jong ki briew ka la shoh ïa uwei u dkhot jong ka seng Shiv Sena ha Thane distrik kaba don ha Maharashtra. Kane ka jingjia ka la jia ha ka sngi U Blei ha kaba hadien kane ka la don ka jingbuh jingujor pyrshah ïa ki 20 ngut ki briew kiba la donkti ha ka kam thombor, la ïathuh u heh pulit jong ka Ambernath ha ka jingïakren bad ki nongthoh khubor.
U Ajit Surendran Nair (39), uba long u Shakha Pramukh jong ka Branch ka Shiv Sena’s (Eknath Shinde group) ha Navre Park kaba don ha Ambernath, u la ong ha ka jingbuh jingmudui sha ki pulit ba ka ilekshon ka dang bteng hapoh ka kynhun jong ka seng ha ka thaiñ ha ka sngi U Blei, la ïathuh ki pulit. Ha katei ka por, ki briew kiba la shah kynnoh ki la poi ha katei ka jaka bad pyrshang ban weng ïa ki shuki ba la buh ban shong da ki dkhot jong ka kynhun.
Haba u Nair u la pyrshah halor kane, kine ki runar ki la shoh la dat ïa u bad byrngem ruh ïa u da ki kyntien kiba sngew shyrkhei, la ïathuh u heh pulit, katkum ka jingujor ba la phah. Une u dkhot ka seng uba la shah shoh u la mynsaw bad u la leit ban buh da ka jingmudui sha ka jaka treikam jong ki pulit bad hadien kane, ki pulit ki la pynkit ïa u sha ka jaka ai jingsumar. U Nair u la ong ruh ba u don hapdeng ka jingsngew sheptieng halor ka jingap jingma ka jingim jong u na kine ki nongthombor pyrshah ïa u, la ong ka jingujor.
Ha kaba ïadei bad ka jingkhmih bniah ïa ka jingmudui, ki pulit ki la buh jingthoh da ka ejahar pyrshah ïa ki 20 ngut ki briew, ha kaba san ngut napdeng jong ki la lah ban ithuh, kine ki nongthombor ki la shah pynngat hapoh ki kyndon jong ka Indian Penal Code (IPC), la ïathuh u heh pulit.
