Shillong, Nailur 03
Ka lympung ïalehkai phutbol ba la pynïaid da ka Tyrsad Area Sports Association (TASA) ha madan Tyrsad, kata ha ki kyrdan bapher bapher ka la ïaid shaid shaid shakhmat.
Haba phai sha ki jingïalehkai ba la pynlong ha ka sngi Saitjaiñ, kata ha ka First Division, ka Wahlyngkien Sunei Sports Club ka la lah ban pynliem noh ïa ka Phudbyrnei Sports Club da 4-0 kol. Ha kane ka jingïalehkai kaba la kham noh shiliang, ïa ki kol jong ka Wahlyngkien la ïoh ban khyrwit da u Roster Thabah ha ka minit ba 30 bad 63, u Daminot Rynjah ha ka minit ba 25 bad u Newshailang Lyngdoh ha ka minit ba 75.
Haba phai sha ka jingïalehkai jong ka kyrdan Second Division, ka Nongwah Sports Club ka la lah ban pynliem noh ïa ka Laitmawhing Sports Club da 2-0 kol bad ïa kine ki kol jong ka Nongwah la ïoh ban khyrwit da u Somstar Rani tang ha ka minit kaba 2 bad u Kitboklang Nongsiej ha ka minit ba 31.
Ha ka jingïalehkai ha ka Third Division pat, ka Nongbri Sports Club ka la lah ban pynliem noh ïa ka Lumlyngdoh Sports Club da 1-0 kol bad ïa kane ka kol la ïoh ban khyrwit da u Pynshailang Nongbri ha ka minit kaba 38.
Ki jingïalehkai ban wan jong kane ka lympung, kin long ne bteng biang pat ha ka 9 tarik mynta u bnai, kata ka jingïakhun ha ka First Division kan long hapdeng ka Pyndenumbri Sports Club pyrshah ïa ka Mawponghong Sports Club ha ka por 3 baje janmiet, katba ka jingïakhun ha ka Second Division pat kan long hapdeng ka Mawliehpoh Sports Club pyrshah ïa ka Mawrohroh Sports Club ha ka por 1.30 mynsngi.
