Shillong, Nailur 03
U kapten barim ka kynhun ïalehkai kriket jong ka Zimbabwe u Heath Streak, hadien ka jingbat jong ka jingshitom kaba la slem, u la khlad noh ha ka rta kaba dang 49 snem, la pynthikna da ka kurim jong u lyngba ka rynsan social media ha ka sngi U Blei.
Lah ban pynkynmaw ba dang ha ki ar taiew ba la leit, ka khubor jong ka jingkhlad noh jong u Streak ka la paw ha social media ba la ai lyngba u Henry Olonga (para nongïalehkai lang), hynrei kane ka khubor ka la paw ba ka dei kaba bakla.
“Ha ka step jong ka sngi U Blei, u kurim ba ieit jong nga bad kpa jong ki khun jong nga, u la khlad noh na kane ka pyrthei,” la thoh ka kurim jong u, ka Nadine Streak ha ka rynsan Facebook.
Na ka liang jong u John Rennie, uba dei u rangïalehkai barim ka Zimbabwe, u la pynthikna ïa kane ka khubor. U la ong, ba u Streak u la khlad ha ka por dang step jong ka sngi Blei ha ka farm ka jong u, kaba don ha Matabeleland.
U Streak, u dei uwei na ki rangïalehkai kriket ba tbit tam ha katei ka por jong u, ha kaba u la mihkihmat haduh 65 tylli ki jingïalehkai Test ïa ka Zimbabwe, 189 tylli ki jingïalehkai ODI, ha kaba u tied run haduh 4933 bad ruh ban khur haduh 455 tylli ki wiket na ka bynta ka Ri jong u.
