Shillong, Nailur 03
Ka Asian Cricket Council (ACC) ka dang pyrkhat ban pynkynriah noh ïa ki jaka ïalehkai na ka bynta ki jingïalehkai Super Four jong ka lympung Asia Cup namar ka jingjur jong ka jinghap slap ha Colombo, Sri Lanka.
Kumba ka long mynta, haduh san tylli ki jing-ïakhun jong ka Super Four bad ïa ka final la dep ban pynbeit bad buh ban pynlong ha Colombo naduh ka 9 tarik mynta u bnai, hynrei kumba ka long mynta, ym pat ïohi dak ba ka suiñ bneng kan ailad.
Kumta, ha kaba ïadei bad kane, ka ACC ka dang don hapdeng ka jingïa-kren bad ka Sri Lanka Cricket (SLC) bad ka Pakistan Cricket Board (PCB) kaba pynlong ïa kane ka lympung, ha kaba ïadei bad ka jingpynkynriah ïa ki jaka ïalehkai.
Ha kaba ïadei bad kane ka jingthmu ban pynkynriah ïa ki jaka ïaleh -kai, la dep ruh ban pyntip sha baroh hynriew tylli ki Ri kiba ïashim bynta ha kane ka lympung.
Ka Pallekele ïa mynta ka dang pynlong ïa ki jingïalehkai league jong ka Asia Cup, hynrei ka jinglah ban wan jong u slap ha kane ka jaka ba long lum, ka kham bun. Katba ka Dambulla ka jngai kumba 70 kilometer na Pallekele, bad ka jinglah ban hap jong u slap ruh kan kham duna bha.
Hynrei na ka liang jong ki bor pynïaid ka SLC ki la ong ba ka Rangiri International Cricket Stadium ha Dambulla, ka lah ban nym lah satia ban pynlong ïa bun ki jingïalehkai ha ka jingpyntip jong ka por kaba lyngkot.
Kumba ka long mynta, ka suiñ bneng ha Ham-bantota la ong ba ka long shai bha ha Sri Lanka ïa mynta, bad na ka liang jong ka ACC ka dang peit bniah halor ka jinglah ne em jong ka Mahinda Rajapaksa International Cricket Stadium ban pynlong ïa ki jingïalehkai jong ka lympung Asia Cup.
