Shillong, Nailur 03
Ka Napoli kaba dei ka lahduh jong ka lympung Seria A ha Italy, ka la mad ïa ka nam rem kaba nyng-kong jong kane ka aiom kaba thymmai, kata hadien ba ka la shah pynliem noh ha la ïing ha ka jingïakhun pyrshah ïa ka Lazio.
Ha kane ka jingïaleh-kai ka Napoli ka la shah pynliem noh da 2-1 kol. Ïa ka kol kaba nyngkong la ïoh ban thep da u Luis Alberto ka Lazio ha ka minit kaba 30 hynrei kane ka kol kam shym la neh slem, ha kaba u Piotr Zielinksi u la ïoh ban pynphai noh tang hadien katto katne minit.
Hynrei u Daichi Kamada, uba ka Lazio ka la soi thymmai dang ha kane ka ïew ïadie ïathied rangïalehkai, u la ïoh ban thep ïa ka kol jong ka jingjop ha ka minit kaba 52, ka ban dei ruh ka kol kaba nyngkong jong u ha ka lympung Seria A.
Kane kan dei ruh ka nam rem kaba nyngkong hapoh ka jingïalam jong u Rudi Garcia uba la shimti ha u bnai Jylliew na u Luciano Spalletti.
Na ka liang jong u Mattia Zaccagni bad u Matteo Guendouzi ki la sngew ba ki la lah ban pyntam shuh ka kol hynrei ïa ka kol jong ki, ym shym la kheiñ satia hadien ba la peit bniah da ka VAR.
Kane ka jingjop, kan dei ruh kaba nyngkong eh ïa ka Lazio ha kane ka aiom kaba thymmai, katba ka Napoli pat kan dang khur ar tylli ki jingjop bad kane ka nam rem, kata na ki 3 tylli ki jingïalehkai ha kane ka aiom.
