New Delhi, Nailur:
U President jong ka seng Congress u Mallikarjun Kharge ha ka sngi Thohdieng u la ong ba ka jingkhlaiñ jong ka kynhun ka liang pyrshah ka la pynkyiuh ïa ka sorkar pdeng bad maham ïa ki dkhot ba la ïatreilang bad ka kynhun INDIA ba ki la dei ban pynkhreh ha kaba ïadei bad ki jingeh ki ban mih ha ki kam saiñ pyrthei naba kin sa don bun ki ban sha ngat ha ki jingshah pyndonkam bakla da ki kynhun tohkit pyrshah ïa ki.
Ha ka jingai jingkren ha ka jingïalang kaba la long ha Mumbai ha kine ki khyndiat sngi ba la leit, u la kynthoh jur ïa ka sorkar da kaba ong ba ka bih ba ka BJP bad ka RSS kumba la kynnoh ka la saphriang ha ki 9 snem ba la leit la ïohi ba ka treikam ha ki kam thombor kiba paw ba dei na ka jingbuh jingïapher kaba la jia pyrshah ïa ki nongleit jingleit kiba lui lui ha ka rel bad ïa ki khynnah skul. Ka jingthmu jong u ka thew halor ka jingjia ba uwei u pulit jong ka tnat Railway u la siat pathar ïa ki briew kiba don hapoh ka rel bad ka nonghikai ha ka skul ha Muzaffarnagar ha kaba ka la hukum ïa ki khynnah ba kin thap ïa u para klas jong ki uba dei u Muslim u bym shym la pyndep ïa ka jingtrei jong ka lynnong kot ba la ai ha skul ban pyndep sha ïing.
