Shillong, Nailur 03
Ka Mohun Bagan ka la ïoh rah ïa ka nam lahduh jong ka lympung Durand Cup hadien ba ka la lah ban pynliem noh ïa ka East Bengal ha ka final kaba la long ha sngi U Blei.
Haba phai sha ka jingïalehkai, ka Mohun Bagan ka la lah ban pynliem noh tang da 1-0 kol ïa ka East Bengal. ïa kane ka kol la ïoh ban thep da u Dimitri Petratos bad pynlong ruh ïa ka Mohun Bagan ban rah ïa kane ka nam lahduh haduh ka sien kaba 17.
Ha kane ka jingïalehkai final kaba la long ha Salt Lake Stadium, kaba la ïakhaid bad shongshit bha, ka Mohun Bagan ka la duna noh uwei u rangïalehkai, hadien ka jingshah beh noh jong u Anirudh Thapa uba la ïoh pdiang ar tylli ki yellow card.
