Shimla, Nailur:
Ka jingwan hap jong u slap ha kane ka aïom Lyiur kaba mynta, ki jingshlei um bad ki jingtwa khyndew ki la jynrat naduh tyllong ïa kiba bun spah tylli ki dieng ha ka bynta ba shaphang Shatei jong ka ri ha Shimla.
Kiba bun tylli ki dieng Deodar ïa kiba la jan kot sha ka 1000 tylli ki la shah jynrat lut, palat 500 tylli ki dieng ba la buh jingma ki la shah pynngat noh bad lajan 800 kiba kum kine ki dang shah khmih bniah na ka bynta ban pynngat ïa ki ha kaba la buh jingkheiñ da ka Shimla Municipal Corporation.
Ki briew kiba dei khmih halor ka bynta ban pynneh ïa ka mariang, ki nongshong shnong, ki Mayor barim bad ki Symbud Mayor jong ka Shimla City ki la kynnoh ïa kine ki heh jong ka kynhun ba ki la pynngat beaiñ ïa kine ki dieng halor ka jingai daw ba ki la buh jingma.
U Environmentalist bad u Symbud Mayor barim jong ka Shimla Municipal Corporation, u Tikender Singh Panwar u la ong ba ka la donkam ban pyntikna ba ka la dei ban don da san shah ka jingthung dieng shuh na kane ka jingshah pynngat ïa kine ki dieng.
“Ka jingkylli kaba hakhmat eh ka long, mano ba la ong ba kine ki dieng ki buh jingma? Ngi la ñiew ba kam dei ka jingshisha halor kine ki jing-ong naba kiba bun ki jingtei jong ki briew bad ki jingshna ki la pynlong ban phah pyntwa ïa ka khyndew. Ki la don kumba katto katne ngut ki briew kiba la pyrshang ban pynngat ïa kine ki dieng ha ka jingai daw ba ki buh jingma,” la ong u Tikender Singh Panwar.
“La dei ban pyntikna ba ym dei ban don ki ïing ne ki jingtei ban shna ha kine ki thaiñ ha kaba ïa ki dieng la dep ban pynngat. La dei ban pyntikna ba la dei ban thung dieng biang bad ban nang pynbun shuh shuh ïa ki bad la donkam na ka bynta ban bet da ki symbai ban pynmih dieng ha kine ki jaka kiba don ha ka nongbah, ” u la bynrap.
