Mumbai, Nailur:
Ki la don palat 150 ngut ki nongrep kiba la pynshisha ba ki la shah thok da kumba T. 113 klur lyngba ka ram ha ki lai tylli ki thaiñ jong ka Nagpur distrik ha Maharashtra, la ïathuh u heh pulit ha ki nongthoh khubor.
U snar nongïalam ha kane ka jingjia, u dei u trai jong ka karkhana tylliat khaw uba na Mauda, ïa uba la shah pynshisha ba u la pynbiej ïa kumba 151 ngut ki nongrep ha kaba u la kular ban pynbiang ka jingïarap pisa hadien ba ki la shah ktah na ka jingjur palat ka jingrang tyrkhong ka suiñ bneng kaba la nang ktah jur nalor ba la duna um lypa ha ka thaiñ ha u snem 2017, la ïathuh u heh pulit.
“Ma u bad ki nongïarap jong u ki la pynplie ïa ki Bank Account ha ka kyrteng jong ki 151 ngut ki nong-rep kiba na ka thaiñ Mauda, Parseoni bad Ramtek hadien ba ki la ïoh ïa ki PAN Card bad ki Aadhaar Card jong ki,” la ïathuh u heh pulit.
“Ki ram ba la long na ka T. 45 lak haduh T. 50 lak kiba don ha ki kyrteng jong ki nongrep ha ka Bank kaba ha Kingsway ha Sadar ki la shah sei tuh bad leit sha ki Account jong ki 12 ngut ki trai jong ki kompeni bapher bapher ba la pynleh da uwei uba la shah kynnoh donkti bad u snar nongïalam ha kane ka kam klop u Ramannnarao Bolla,” la bynrap shuh shuh u heh pulit.
Kane ka kam klop tyngka ka la paw pyrthei haba kiba bun na ki nongrep, ki bym shym ïoh jingtip ei ei shaphang kine ki ram, dang shen ki la ïoh jingthoh na ka Bank ba ki la dei ban sdang siew noh ïa ka pisa, ha kaba hadien kane ki la leit ban ïakynduh ïa u Bolla, u la ïathuh shuh shuh.
“Naba u Bolla um shym la pynphai ïa ka pisa kumba u la kular ki la leit mudui noh sha ki pulit. Ki la don kumba 6 ngut ki nongrep ki bym don wat tang ïa ka jaka rep lajong,” u la bynrap.
Hadien ka jingkhmih bniah jong ki pulit la pynngat da ki kyndon kiba hapoh ka Indian Penal Code, Information Technology and Maharashtra Protection of Interest of Depositors Act, pyrshah ïa u Bolla bad ïa ki 17 ngut kiwei pat, kynthup ïa ki briew jong ka Bank bad ki trai jong ki 12 tylli ki kompeni ba la khmih bad long trai da une u snar nongïalam ha ka kam beaiñ.
