New Delhi, Nailur:
Ka Indian National Developmental Inclusive Alliance (I.N.D.I.A), ka kynhun synrop jong ki 26 tylli ki seng, ha ka sngi Thohdieng ki la rai ban ïakhunlang na ka bynta ka ilekshon Lok Sabha ka ban sa wan katba lah bad ong ba ka jingpynbeit ha kaba ïadei bad ka jingïabhah ïa ki konstitwensi ha kiba bun ki jylla kan sa long shen. ‘
Ha ka jingthoh ba la phah ha ka sngi kaba khatduh jong ka jingpynlong ïa ka jingïalang kaba ar sngi, ka kynhun synrop ka la ong, “Ngi, ki seng hapoh jong ka INDIA, ngi la lah ban pdiang bad rai ban ïakhun ïa ka ilekshon Lok Sabha bad ki jingpyntreikam ki la long kham kloi katba lah, ka jingïabhah ïa ki konstitwensi, ka jingïakren ha kaba ïadei bad ka jingïabhah ïa ki konstitwensi kan sa long shen bad ban lah ban pynkut kham kloi ha ryngkat ka jingïatreilang na ka jingïalang kaba la long da ka jingïa-ai jingmut kaba markylliang.”
Ka jingthoh ka la ong, “Ngi, ki seng hapoh ka INDIA, ngi la don hangne ban ïakren halor ka jingthmu ban pynlong ïa ki jingïalang paidbah kaba kham kloi ki ban long ha ki bynta ba bun jong ka ri halor ka mat jong ka jingsngewkhia na ka bynta ki jinglong jingman kiba la ktah ïa ki riewpaidbah bad kumjuh ban wanrah ïa ki bynta kiba kongsan tam na ka bynta ki jingpyntreikam.
