Shillong, Nailur 04
Ka jingïaid lynti u Thomas Muller na ka bynta ka kynhun ïalehkai ka Germany kam pat shym la kut namar u coach katei ka ri u Hansi Flick ha ka Lah Sngi U Blei u la pynbna biang ïa ka kyrteng utei u rangïalehkai ba la 33 snem ka rta.
Kane ka long ka sien kaba nyngkong ha ki khyndai bnai ba un shah khot ban mihkhmat biang ïa katei ka ri bad kane ka long ban mih bujli ha ka jaka u rangïalehkai shakhmat u Niclas Fullkrug, uba la mynsaw.
Kumba ka paw u Muller u la ïoh ban ïalehkai haduh 121 sien na ka bynta ka Germany ha ka World Cup ha Qatar ha ka 1 tarik u Nohprah jong u snem ba la lah, ha kaba ka Germany kam shym la lah ban jam sha ka pre-quarter final. U Muller u la ong ha kato ka por ba kan dei ka sien kaba khatduh ïa u ba un ïalehkai na ka bynta katei ka ri, hynrei hadien u la ong ba ka dei tang na ka jingsngew ka jong u bad u lah ban shah jied biang. Te kumta utei u rangïalehkai um shym la shah jied na ka bynta ki san tylli ki jingïalehkai paralok.
U Muller u la wanphai ha ka por kaba eh ba ka Germany ka la don hapdeng ka jingeh bad ka jingthmu u Flick ka long shi bynta ban pynkhreh ïa ka European Championship ka ban long ha u snem ban wan.
Kumba ka paw ka Germany ka la jop tang shisien na ki san sien ïakhun ha u snem 2023 bad mynta kan pynkhreh ïa ki jingïalehkai paralok pyrshah ïa ka Japan, kaba la jop ïa ka Germany ha ka World Cup, ha Wolfsburg ha ka sngi Saitjaiñ bad ia ka kynhun ba wan ba-ar ha ka World Cup ka France ha ka 12 tarik mynta u bnai ha Dortmund.
U Muller u la ïoh ban shimti kum u kapten na ka bynta ka Bayern Munich, kaba la jop da 2-1 kol pyrshah ïa ka Borussia Moenchengladbach ha ka sngi Saitjaiñ.
