Mairang, Nailur 04
Ka kynhun ïalehkai jong ki khynnah kynthei bad shynrang jong ka Kynshi Higher Secondary School ka la ïoh ban khur ïa ka nam lahduh ha ka lympung ïalehkai ba shi sngi ba la tip kum ka “1st Eastern West Khasi Hills District Level Inter School Kho Kho Tournament 2023”.
Ïa kane ka lympung ïalehkai la pynlong da ka shlem trei kam jong ka District Sports Officer, West Khasi Hills District ha ka Lah Sngi U Blei ha madan shnong Kynshi.
Nalor nangta ha katei ka sngi u BDO ka Mawthadraishan Block u Bah W.L. Massar u la long kum u kongsan ha ryngkat ka jingïadon lang u President ka Kho Kho Association u Bah Aibanrikupar Syiemlieh, ki nonghikai na ki skul bapher bapher ki khynnah bad kiwei ki riew paidbah kiba wan ban peitkai.
Ha katei ka lympung ïalehkai ki skul kiba la wan ban ïashim bynta ki kynthup ïa ka Kynshi HSS, Little Star English Medium School, ka Myriaw Rmsa HSS, bad ka St Joseph HSS ïa kaba la phiah ha ki ar bynta kynthup ha ka liang ki kynthei bad shynrang.
Lah ban kdew hangne ka jingpynlong ïa kane ka jingïalehkai ka long ban pynkhie im biang ïa ka jingïalehkai kho-kho bad ban ïarap pynpaw ïa ka sap ki khun samla ha ka jingïalehkai kho-kho bad ban kyntiew ruh ïa ka thaiñ.
