Shillong, Nailur 04
Ka Manchester City ka la pynkhreh ban buh ka jingtyrwa ïa u Erling Haaland ha kaba ïadei bad ka jingsiew kaba £600,000 ha ka shi taiew bad kane ka long shi bynta ban pynskhem biang na ka bynta ka kontrak kaba saw snem bad utei u rangïalehkai shakhmat na Norway.
Kumba ka long mynta u Haaland u la ïoh ïa ka jingsiew kaba £375,000 ha ka shi taiew bad une u rangïalehkai u la ïoh ïa ka jingsiew kaba ïaryngkat bad u Kevin de Bruyne.
Kane ka jingïateh soskular kam dei tang ba ka la pynlong ïa u kum u rangïalehkai uba ïoh ïa ka jingsiew kaba heh ha ka Man City, hynrei kan pynlong ïa u ba un ïohnong lyngba ka kontrak ha ka lympung ïalehkai Premier League.
Ïa kane ka kontrak lah ban pynurlong tang lada u Haaland u pdiang ïa ka jingïateh kular kaba thymmai bad ka Man City. Lada u kyntait ïa katei ka jingtyrwa kan pynlong ïa u ba u lah ban leit ïasoh sha kiwei pat ki kynhun ïalehkai kum ka Real Madrid ha ka lawei ka ban wan.
Ki khubor ki ïathuh ba lada u soi ïa katei ka kontrak kaba thymmai, katei ka kynhun ba khlaiñ bor jong ka LaLiga ka lah ban shem jingeh ban buh ka jingtyrwa na ka bynta utei u rangïalehkai na Norway.
