Shillong, Nailur 04
Ka Galaxy Junior FC ka la long ka kynhun kaba la jam sha ka semi final ha ka lympung ïalehkai Foot-ball Knockout Tourna-ment ba la pynïaid da ka Ri Khasi Social Cultural & Sports Club.
Kane ka jinglah ban pynthikna ka la wan urlong hadien ba ka lah ban pynliem noh ïa ka Risyon FC da 3-1 kol ha ka Lah Sngi U Blei ha madan Kurkalang kaba ha Bhoi Rymbong.
Ha ka jingïakhun quarter final kaba ar, baroh ar ki kynhun ki la ïakhun tyngeh naduh kaba sdang ha kaba ki la ïoh ïa ki katto katne ki kabu kiba biang, hynrei kim shym la lah ban pynurlong.
Dei ha ka minit kaba 23 ba ka Galaxy ka la ïoh ban pynkhih jar nyngkong eh lyngba u Precius Kharbhih. Hadien shiteng kynta kane ka kynhun ka la pynbud biang ïa ka kol kaba ar lyngba u Benny Khyriam ha ka minit kaba 39 na ka bynta ban tam da 2-0 kol ha ka kylla step.
Hadien ar minit ba la bteng ïa ka jingïakhun jong ka kylla miet, ka Risyon ka la lah ban pynphai kylla lyngba u Edy Dkhar (47).
Ka Galaxy kam shym la kheiñ sting ha kaba ka la ïai bteng ban ïakhun tyngeh bad dei ha ka minit kaba 60 ba ka la ioh ban thep biang ïa ka kol kaba lai lyngba u Rostom Khyriam.
Haduh kaba kut ka jingïalehkai ka Risyon kam shym la lah shuh ban pynphai na ka daw ka jingïalehkai bha u rangapkol ka Galaxy, u Peter Lyngdoh bad ha kaba kut ka la mad ïa ka jingshah rem.
U Peter u la khur ïa ka nam Man of the Match na ka daw ka jingïalehkai bha ha kane ka jingïakhun bad ïa katei ka khusnam la sam da u Advisor barim ka seng RBYF.
Lyngba kane ka jingjop, ka Galaxy ka dangap ïa ka ka kynhun ka ban khur jingjop ha ka quarter final kaba lai ka ban long ha ka 9 tarik hapdeng ka Blue Bumbar bad ka Kharsyntiew FC.
Katba ka Oste Phi Oiñ kaba la rung semi final nyngkong, ka dangap na ka jingmih jong ka jingïakhun quarter final kaba khatduh ka ban long ha ka 11 tarik mynta u bnai hapdeng ka Megha -laya Police (MLP) pyrshah ïa ka Jaguar FC.
