Shillong, Nailur 04
Ka Jylla ka la lah ban sei da u coach sha ka 19th Asian Games ka ban long ha Hangzhou, China naduh 23 tarik mynta u bnai haduh 8 tarik u Risaw mynta u snem.
Kumba ka paw ka Jylla ka la lah ban sei tang ar ngut ki nongïalehkai ha ki snem kiba mynshwa kata ka Kong Matsiewdor War Nongbri (Archery) bad u Bah Damang Syngkon (Karate). Pynban kat haduh mynta kam shym la lah ban sei shuh ïa ki nongïalehkai kiba kynsai, hynrei kaba sngewtynnad mynta u snem ka long ba uwei na ki coach ba kynsai ka Jylla u Torak Kharpran u la long uwei na ki coach ha ka jingïalehkai Boxing uba la shah jied ban leit lang bad ka kynhun sha China bad katei ka kynhun ïakura ka la mih na India ha ka sngi U Blei.
Ha katei ka lympung ka ban long ha China, ka India kan ïashim bynta haduh 37 tylli ki jingïalehkai. Kine ki kynthup ïa ka Archery, Aquatics, Athletics, Badminton, Boxing, Cycling, Fencing, Hockey, Judo, Rowing, Shooting, Table Tennis, Weightlif-ting, Wrestling, Bridge , Chess, Golf, Gymnastics, Kayaking & Canoeing, Ju-Jitsu, Squash, Soft Tennis, Tennis, Wushu, Basket-ball, Equestrian, Kabaddi, Kurash, Rugby, Sepaktakraw, Volleyball, Handball, Sports Climbing, Football, Roller Sports, Cricket, Sailing bad ka Esports.
Na ka liang ka tnat ïalehkai jong ka Sorkar Pdeng ka la mynjur haduh 634 ngut ki nongïalehkai ki ban ïashim bynta ha kitei ki 37 tylli ki jingïalehkai bad ha ka Asian Games ba ka la lah ki la don tang 572 ngut ki nongïashim bynta.
Haba kheiñ lang ïa ki jingïalehkai ki ban long ha China ki don baroh 61 tylli ha kaba yn pynlong ha Hangzhou bad ha ki san tylli ki nongbah kiba ha China.
Lah ban kdew ha ka Asian Games 2018 kaba la long ha Jakarta bad Palembang, ka India ka la khur 70 tylli ki takma ha ki jingïalehkai bapher bapher, kiba kynthup ïa 16 tylli ki takma ksiar, 23 ki takma rupa bad 31 tylli ki takma rnong.
