Bhubaneswar, Nailur:
Ka kynhun Special Task Force (STF) ki la ïoh ban kurup ïa ka pisa thok kaba la kot sha ka T. 41.16 lak ha Sonepur distrik kaba don ha Odisha. Uwei u briew ïa uba la tip kyrteng kum u Deepak Meher u la shahkem ha kaba ïadei bad ka kane jingjia.
Kine ki pisa thok ba la ïoh ban kurup ki don ha ki lut T. 500, la ïathuh ki pulit. Ki pulit ki la ïathuh ba kine ki pisa ki dei kiba la wanrah na Chhattisgarh bad la suba ïa ka jingdonkti jong kiba bun ngut ki briew ha kane ka kam sniew.
U Superintendent of Police (SP) jong ka kynhun STF u Kishore Kumar Panigrahi u la ong, “Ngi la lap ksai halor kane ka jingjia, bad mynta ka jingtrei shitom ka dang ïaid shakhmat ban ithuh bad ban ïohkem sa ïa kiwei pat kiba la shah kynnoh donkti ha ka jingjia”.
Ka kynhun STF ha ka sngi Thohdieng ka la pynlong ïa ka jingleit khynra sha ki jaka ba don hajan Ulunda ha ka distrik hadien ba ka la ïoh jingtip ba la don ki briew kiba la pynsaphriang ïa ki pisa thok.Ïa kine ki nongleh bymman la pynngat ha ki kyndon jong ka 489-A, 489-B, 489-C bad 120(B) jong ka Indian Penal Code (IPC) hadien ka jingïoh ban kurup ïa kine ki pisa.
Ïa kane ka pisa ba la ïoh ban kurup yn sa phah sha Bharatiya Reserve Bank Note Mudran Pvt. Ltd na ka bynta ban pynlong ïa ka jingkhmih bniah.
