Shillong, Nailur 05
Ka Shillong Lajong ka la pynbna ba ka la soi ïa u rangïalehkai shakhmat nabar ri u El Hadji Abdou Karim Samb na ka bynta ban pynkhreh ïa ka lympung ïalehkai I-League 2023-24.
Une u long rangïalehkai ba-ar nabar ri ïa kaba ka SLFC ka la soi hadien u rangïalehkai ‘dien na Brazil u Daniel Goncalves.
Kat kum ka jingpyllait khubor da katei ka klob ka nongbah, la ong ba utei u rangïalehkai ba dang 27 snem na Dakar kaba na Senegal, u la ïalehkai na ki katto katne tylli ki klob kiba na Turkey, Beirut, Morocco, Lebanon bad Libya.
La ong ba u ïadon bynta ban khur jingjop ha ka First Division League 2016 ha Senegal na ka ASC Jaraaf Senegal kynthup ïa ka nam Best Player na ka daw ka jingtbit ban ïalehkai bha ha utei u snem.
Utei u rangïalehkai na Senegal u la ïadon bynta ban khur jingjop ruh ha ka 1st Division jong ka Senegalese Championship ha u 2017 na ka Jarraf FC bad u Karim u la long uba ar na ki ‘rang thep kol ba kynsai.
