Agartala, Nailur:
Ka seng CPI(M), kaba long ka seng ka liang pyrshah kaba la ïakhun ha ka ilekshon shiteng samoi jong ka Boxanagar bad ka Dhanpur, ha ka sngi Ba-ar ka la buh ka jingkyrpad na ka Election Commission of India ba ka la dei ban pyndam noh ïa baroh ki kam ba la dep ban leh ha ka ilekshon baroh kawei bad ban pynlong noh da kawei pat ha baroh ar tylli ki konstitwensi.
Khyndiat kynta hadien ba la dep ban pynlong ïa ka ilekshon ha baroh ar tylli ki konstitwensi, u State Secretary jong ka seng CPI(M) ha Tripura u Jitendra Choudhury u la thoh da ka shithi sha u Chief Electoral Officer na ka bynta ban pynpaw ïa katei ka jingdawa. Ïa ka kopi jong kane ka shithi la phah ruh sha u Chief Election Commissioner, ha New Delhi.
Ha ka shithi kaba u la phah, u nongïalam jong ka seng CPI(M) u la ong, “Ka ilekshon shiteng samoi ha ka konstitwesi Assembly jong ka 20-Boxanagar bad 23-Dhanpur Assembly ka la long hapoh ka jingpynbeit ne ki jingai hukum jong ki runar jong ka seng BJP kaba bat ïa ka jingsynshar ha kaba ki la pyndonkam ïa ka kynhun jong ki pulit bad ki heh sorkar lyngba ki kam sniew jong ki.
Ha ka jaka ban beh noh ïa ki briew kiba nabar na ka konstitwensi bad ki thaiñ ba marjan, ki runar kiba dei jong ka seng BJP, ki la ailad ïa kiba bun ki briew ba kin rung ha ki thaiñ jong kine ki konstitwensi naduh ka miet jong ka 3 tarik, Nailar, 2023.
Kine ki la shah bhah kam ha ki bynta ba bun jong ki thaiñ jong kine baroh ar tylli ki konstitwensi na ka bynta ban trei ïa ka kam ha ka sngi ba don ka jingthep vote.
Ha ka miet jong ka 4 tarik, Nailar u Abu Jafar, uba long u nongïalam jong ka seng CPI(M) u la shah thombor ha ka ïingsah jong u kaba don ha Boxanagar ha u kyrtong jong ka seng BJP u Tofazzal Hussain.”
