Lucknow, Nailur:
Khyndiat sngi hadien ba ka dur-khih (video) jong ka jingshah thap jong uwei u khynnah skul uba dei u Muslim ha ki para klas ha Muzaffarnagar kaba don ha Uttar Pradesh, da ka jingai hukum jong ka nonghikai kaba hikai ïa ki, ka Supreme Court hynnin ka sngi ka la hukum ïa u Superintendent jong ki pulit ka Muzaffarnagar ba ki la dei ban phah ïa ka kaiphot ha kaba ïadei bad ka jingpynlong ïa ka jingtohkit bad ban pyntikna ha ka ban ai ki lad jingïada bad pynïoh jingshngaiñ ïa une u khynnah bad ïa ki kmie ki kpa jong u.
Ka ïingbishar ka la phah ruh da ka shithi sha ka sorkar UP, ha kaba la hukum ba ka la dei ban ai ïa ka jubab halor kane ka jingjia ha ka 25 tarik, Nailur.
Ïa ka jingmudui la buh da u Tushar Gandhi ha kaba la dawa ba la dei ban pynlong da ka jingtohkit kaba laitluid, kynthup ha kaba ïadei bad ka jingbuh ïa ka jingujor ejahar kum shi bynta ban burom ïa une u khynnah skul uba don ha ka rta kaba 7 snem uba dei na Muzaffarnagar.
Ka skul kaba une u khynnah u la pule kaba dei ka skul jong ki riew shimet ïa kaba la tip kum ka Neha Public School, ka la shah khang noh shipor bad ka National Commission for Protection of Child Rights ka la bthah ïa ki pulit jong ka Uttar Pradesh ba kin buh da ka jingujor ejahar pyrshah ïa kane ka nonghikai, ïa kaba la tip da ka kyrteng kum ka Tripta Tyagi.
Kane ka nonghikai ka la shah pynngat ha ki kyndon 323 bad 504 jong ka Indian Penal Code, la ïathuh ka tyllong khubor, ha kaba la bynrap shuh shuh ba haduh mynta kam pat shah kem. Ka jingtohkit halor ka jingjia ka dang ïai bteng.
