Hyderabad, Nailur:
Naba ka ilekshon sha Telangana State Assembly ka la jan, ka seng Congress ka la pynkhlaiñ ïa ka jingpyntreikam na ka bynta ban pynpaw ïa ka jingkhlaiñ bor jong ka seng ha Hyderabad da kaba pynlong ïa ka jingïalang paidbah ha ka 17 tarik, Nailur, ha kaba yn sa sdang shwa da ka jingïalang kaba nyngkong jong ka kynhun kaba dang shah jied thymmai ka Congress Working Committee (CWC) la ïathuh ki heh ba dei khmih halor kane ka bynta.
“Ngi la buh da ka jingtyrwa kaba ha ka sien kaba saw hakhmat u President jong ka All India Congress Committee [AICC] u Mallikarjun Kharge ha ka jingleit jngoh jong u ïa ka Telangana ha ka taïew ba la dep. Ïa kawei pat ka shithi la phah sa sha ka kynhun nongïalam jong ka seng,” la ong u nong-aiktien jong ka Pradesh Congress Committee (PCC) u B Ayodhya Reddy ha ka jingïakren bad ki nongthoh khubor.
U nongaiktien u la ong ba ka kynhun nongïalam jong ka seng ka la pdiang ïa kane ka jingkyrpad bad ka la kyntu ïa ka PCC ba kan nang ïaid shakhmat ha kaba ïadei bad ki jingpynbeit ryntih na ka bynta ka jingïalang paidbah.
Kumba la thmu, la ong ba ka seng ka la khmih lynti ba da ka jingpynlong ïa ki jingïalang paidbah yn sa lah ban nang pyntyllun shuh shuh ïa ki jingpyntreikam jong ka seng khamtam hashwa ban don ka ilekshon.
Ki heh nongpynïaid jong ka seng ki la don ka jingkyrmen ba na ka jingbuh ïa kiba bun ki jingïalang paidbah yn sa lah ban pynsngewthuh ïa ki paidbah ban jied ïa ki nongmihkhmat ha ka jylla.
