Mumbai, Nailur:
U President jong ka seng Nationalist Congress Party (NCP) u Sharad Pawar hynnin ka sngi u la ong ba ym don hok mano-mano ruh ban pynkylla ïa ka kyrteng jong ka ri, hadien ba ka seng Congress ka la pynshisha na ka shithi ba la wer sha ka jingïabam na ka bynta ka jingdon jong ka G20 la phah sha ka President kumne “President of Bharat”.
U Sharad Pawar u la ong ba ka la dei ban don ka jingkhmih bad ka jingïatai kaba bniah ha kaba ïadei bad kane ka mat ha ka jingïalang ka ban long mynta ka sngi ba la pynlong da u President jong ka seng Congress u Mallikarjun Kharge bad ki heh jong ki seng kiba dei jong ka kynhun INDIA, ki 28 tylli ki seng kin sa ïakhun pyrshah ïa ka seng BJP kaba lamkhmat ïa ka sorkar kmie ha ka General Election ka ban sa long ha u snem ban wan.
“Ngam sngewthuh ba balei ka seng kaba bat ïa ka jingsynshar ka sngewthut ha kaba ïadei bad ka kyrteng jong ka ri,” la ong u heh nongïalam jong ka seng NCP ha ka jingïakren bad ki nongthoh khubor ha ka jingïalang bad ki nongthoh khubor ha Jalgaon distrik kaba don ha Maharashtra.
