Bengaluru, Nailur:
Ka sorkar jong ka jylla Karnataka ka la don jingthmu ban sam da u khaw 5 kilo ha ka jaka ka pisa hapoh ka skhim Anna Bhagya sha ki nongïoh myntoi ha ki thaiñ bapher bapher kiba shah ktah na ka jingrang tyrkhong, la ong u Myntri jong ka Food and Civil Supplies u KH Muniyappa.
Ha ka jingïakren bad ki nongthoh khubor u la ong ba yn sa sdang ban sam ïa u khaw hadien ka jingpynbna jong ka sorkar ïa ki kyrteng jong ki nongïoh myntoi kiba la don ha ka thup jong kito kiba shong basah ha ki thaiñ kiba la shah ktah jur na ka jingrang tyrkhong.
Dang shen, ka sorkar ka la pyllait ïa ka pisa sha ki Account jong ki nongïoh myntoi ha ka jaka ban ïoh shuh sa 5 kilo u khaw kumba la pynbna ha ka mat treikam jong ka seng Congress naba ym dap khaw shuh.
“Ha ki 10 sngi ban wan, ka sorkar jylla kan sa ai ïa ka rai ban sam da 10 kilo u khaw sha man ki nongïoh myntoi. Ngi la ïakren halor kane bad ka Andhra Pradesh, Telangana bad Chhattisgarh. Ngi don ka jingkyrmen ban ïoh ïa u khaw ha ka dor kaba biang,” u la ong.
Ha kaba ïadei bad ka hukum ban phah ïa ka pisa hapoh ka jingtreikam jong ka skhim Anna Bhagya, u Muniyappa u la ong ba ka sorkar ka la dep ban pyntreikam ha kaba ïadei bad ka jingthmu ban phah jingkyrshan sha ki 97 lak ngut ki nongïoh myntoi kiba don ïa ki Card ha u Naitung.
“Ki la don baroh kumba 3.45 klur ngut ki briew kiba la ïoh ïa ka pisa kaba la kot sha ka T. 566 klur ha u Naitung. Ha u bnai Nailar, ngi la pyllait ïa baroh ka pisa kaba long T. 606 klur sha ki 3.69 klur ngut ki briew. Ki la don kumba 21 lak ngut ki briew ki bym shym don ïa ki Bank Account. Ngi dang pynleh ïa ki Account na ka bynta ki 14 lak ngut ki briew,” u la ong shuh shuh.
