Shillong, Nailur 10
Ka lympung ïalehkai phutbol ba la pynïaid da ka Tyrsad Area Sports Association (TASA) ha madan Tyrsad, kata ha ki kyrdan bapher bapher ka la ïaid shaid shaid shakhmat.
Haba phai sha ki jingïalehkai ba la pynlong ha ka sngi Saitjaiñ, kata ha ka First Division, ka Mawponghong Sports Club ka la lah ban pynliem noh ïa ka Pyndenumbri Sports Club da 4-0 kol. Ha kane ka jingïalehkai kaba la kham lah shiliang, ïa ki kol jong ka Mawponghong la ïoh ban khyrwit da u Kynmawlang Kharryngki ha ka minit ba 47 bad 73, u Lastborn Marwein ha ka minit ba 74 bad u Kyrshan Khongsit ha ka minit ba 81 kaba la wan lyngba ka jingshut penalty.
Haba phai sha ka jingïalehkai jong ka kyrdan Second Division, ka Mawrohroh Sports Club ka la lah ban pynliem noh ïa ka Mawliehpoh Sports Club da 1-0 kol bad ïa kane ka kol jong ka Mawrohroh la ïoh ban khyrwit da u Deverson Umdor ha ka minit kaba 35.
Ha ka jingïalehkai ha ka Third Division pat, ka Kyiem Sports Club ka la lah ban pynliem noh ïa ka Niamsang Sports Club da 1-0 kol bad ïa kane ka kol la ïoh ban khyrwit da u Kerningstar Kharhunai ha ka minit kaba 5.
Ki jingïalehkai ban wan jong kane ka lympung, kin long ne bteng biang pat ha ka 16 tarik mynta u bnai, kata ka jingïakhun ha ka First Division kan long hapdeng ka Bara Football Club pyrshah ïa ka Pomsanngut Sports Club ha ka por 3 baje janmiet, katba ka jingïakhun ha ka Second Division pat kan long hapdeng ka Perlseh Sports Club pyrshah ïa ka Madan Mawser Sports Club bad ha ka Third Division pat ka jingïakhun kan long hapdeng ka Mawkynroh Sports Club pyrshah ïa ka Nonglwai Sports Club.
