New Delhi, Nailur:
U Myntri Rangbahduh ka India, u Narendra Modi ha ka Sngi Saitjaiñ u la pynpaw ka jingsngewkhia halor ka jingshah lynshop jong ka Morocco ha u jumai bah uba la pynkhynñiuh ia kylleng ki bynta jong katei ka ri ha ka miet Sngi Thohdieng, ha kaba palat 600 ngut ki la duh noh la ka jingim ha katei ka jingjia. Kumta ruh na ka liang jong ka India, u Modi u la ong ba ka India ka kloi ban iarap bad ai jingkyrshan ia ka Morocco ha ki liang bapher katba ka lah ei ban iarap bad noh synñiang.
La ong ba u jumai bah uba jur u la pynkhynñiuh ia ka Morocco ha ka miet Sngi Thohdieng ha ka por kumba 11:11 baje eiei bad palat 600 ngut ki briew kiba la duh noh la ka jingim ha katei ka miet.
Kumta ruh ha kaba ai jingkren ha ka jingialang ‘G20 Summit’, u Modi u la phah ia ka kyrwoh sngewlem sha katei ka ri bad sha kito ki paidbah kiba la ngat ha katei ka jingjia kaba sniew bok ha katei ka sngi.
Katkum ki dur bad video ba la pyn saphriang da ki paidbah na Morocco, la iohi ia ki ïing mala kiba la khyllem bad julor bad ki jingtei kiba la twa bad hap sha madan hadien ba utei u jumai uba jur u la leit ban pyn khñiuh ia katei ka ri ha katei ka miet, ha kaba ki paidbah ki la shu ia phet ruma bad phet na ki iing ki sem jongki ha ryngkat ka jingiam- lynñiar jong ki khun rit jongki ha katei ka miet.
