New Delhi, Nailur:
U Myntri Rangbahduh ka India, u Narendra Modi ha ka Sngi Saitjaiñ u la pynbna ba ka kynhun G20 ka la mynjur halor ka jingpynrung ia ka African Union kum ka dkhot ba pura jong ka Group 20 (G20) ha kane ka kynti. Kane ka long ruh ka jingmyntoi ia baroh ki ri kiba don hapoh jong kane ka kynhun khnang ban kham lah ban pyniaid kham bha ia ki kam- ki jam baroh kumba katei ka kynhun ka ju leh baroh shi katta.
Kane ka jingpynbna jong u Modi ka long ha ka por ba u Modi u ai jingkren kum ka jingkren lam khmat ban sdang ia ka jingialang G20 ha katei ka sngi. Kumta ruh u Modi u la ong ba baroh ki dkhot jong kane ka kynhun ki la pdiang sngewbha ia ka African Union bad ka long ruh ka sien ba 2 ia kum kitei ki kynhun ba kin ioh ban rung bad ban long ki dkhot ba pura jong ka kynhun G20 hadien jong ka European Union kaba la dep ban pyniasoh ha ki por ba la leit.
Ha katei ka por, u Modi u la ia khublei kti ruh bad u nongialam ba haklieh jong ka African Union, u Azali Assoumani bad u la da ai khublei bad pdiang sngewbha ruh ia u ha ka rukom kaba itynnad shuwa ba un ai jaka ia u ban shong ha ka shuki jong ka miej heh ban ïamir jingmut lang ha katei ka jingialang.
Kumjuh ruh la ong ba u Modi ha katei ka jingialang, u la kren shaphang ki kam bad jinglah jong ka India katba ym dei pat ha ka kyrteng jong ka India hynrei u la khot ia ka India da ka ‘Bharat’, kaba long ka kyrteng ba la sot na ka Sanskrit kaba rim bha ba la buh da ki jaitbynriew Hindu.
Kumta, haba ai jingkren pynsdang ha katei ka sngi, u Modi u la kyntu ia baroh ki nongialam jong kitei ki 20 tylli ki dkhot katei ka kynhun ba kin iasnoh kti lang kum ki dkhot jong kawei ka kynhun, naka bynta ban iakhun ia ki rai-eh rai-dam ba ka kynhun ka kynduh hapdeng ka jingiaid lynti ha kine ki sngi bad ban wanrah ka jingmyntoi ruh ia ka pyrthei baroh kawei ha ki por ba donkam ia ka jingiarap bad jingkyrshan jong ki.
