Guwahati, Nailur:
Ka jingshlei um ha Assam ka la duna naba ym shym don shuh kiwei pat ki thaiñ ki ban dang sdang shah ktah na ka jingshlei um bad ka jingshah ktah jong ki briew na ka jingshlei um ka la hiar sha ka 80,000, ngut, la ïathuh ki heh ba dei khmih.
Kumba la sakhi, la ong ba ha une u snem ba mynta ki briew kiba la ïap na ka jingshlei um ki la don 18 ngut naba haduh ba la thoh ïa ka khubor ym don shuh ki briew ki ban ïap na ka jingshlei um.
Ka tyllong khubor kaba la wan na ka Assam State Disaster Management Authority (ASDMA) ka la ong ba ki la don kumba 79,060 ngut ki briew kiba dang shah ktah na ka jingshlei um ha ki phra tylli ki distrik.
Nalor kane ka la ïathuh ba ka jingdon jong ki briew kiba la shah ktah na ka jingshlei um haduh ka taïew ba la lah kata haduh ka sngi U Blei ba la dep, ki la don 1.22 lak ngut ha kylleng ki 7 tylli ki distrik, la ïathuh ka tyllong khubor.
Ka tyllong khubor ba la ïohlum, da ka Assam State Disaster Management Authority (ASDMA) ka la ong ba ki la don palat 1,22,000 ngut ki briew kiba la shah ktah namar ka jingshlei um ha Barpeta, Chirang, Darrang, Golaghat, Kamrup Metropolitan, Morigaon bad Nagaon distrik haduh ka taïew ba la lah.
Ka Darrang ka la long ka bynta kaba la shah ktah jur ha kaba ka la don palat 60,600 ngut ki briew kiba la shah ktah jur, ha kaba la bud da ka Golaghat da 45,300 ngut bad ka Morigaon da 6,500 ngut, ka la bynrap.
Haduh ka sngi Saitjaiñ, ki la jan don kumba 2.43 lak ngut ki briew kiba la shah ktah na ka jingshlei um ha ki 13 tylli ki distrik.
Naba ym shym don shuh ki briew kiba la ïap ha kino kino ki jaka jong ka jylla, la ong ba ka jingïap jong ki briew na ka jingshlei um bad kiwei pat ki jingjia kiba la mih na ka jinghap jong u slap uba jur ka la neh 18 ngut haduh mynta.
Ki bor sorkar ki la ïaleh katba lah ban pyntreikam ïa ki jaka sah ba shipor jong ki lanot ha ki lai tylli ki distrik, ha kaba ki la don kumba 1,331 ngut ki briew kiba la ïoh jaka sah bad haduh mynta ka jingpyntreikam na ka bynta ban sam ïa ki jingdonkam jong ki lanot ha ki 17 tylli ki jaka ba la buh ha ki saw tylli ki distrik ka dang ïai bteng.
Kumba ka long mynta, la ong ba ki la don kumba 583 tylli ki shnong kiba dang shah ktah na ka jingshlei um bad kumba 8,592.05 hectares ki jaka rep ki la shah pynjulor ha kylleng ki jaka jong ka jylla, la ong shuh shuh ka tyllong khubor ba la wanrah da ka ASDMA.
Ki la don shibun ki jingtwa khyndew kumba la sakhi ha kaba kine ki la jia ha Bongaigaon, Dhubri bad Tinsukia, la bynrap ka tyllong khubor ba la ïohlum.
Ki jingker, ki surok, ki jingkieng bad kiwei pat ki jingshna ki la shah pynjulor lut na ka jingshlei um ha Darrang bad Morigaon.
Ha wah Brahmaputra ka la kiew bha ka um haduh u dak ba buh jingma ha Dhubri, la ong ka ASDMA. Na ka jingjia jong ka jingshlei um, ki la don palat 97,400 tylli ki jingri bad ki mrad ha ki Farm ki la shah ktah jur ha kiba bun ki jaka jong ka jylla.
