Imphal, Nailur:
Ka Manipur Human Rights Commission (MHRC) ka la pyrshah jur bad mudui halor ka jingshah pynkynriah jubor jong ki longïing Kuki ha Imphal ha kaba la pynshisha ba kane ka la long da ka jingleh donbor jong ki bor sorkar ha ka jylla.
Ka Commission naduh ka sngi Balang ka la dep ban phah shithi sha kiba dei ban khmih bniah halor kane ka jingjia, kaba la leit sha u Chief Secretary, jong ka jylla Manipur, u Commissioner (Home), jong ka Manipur, u DGP, Manipur bad u SP ka Imphal East ba kin phah ïa ka kaiphot ha kaba ïadei bad ka jingshah kynnoh ba ki la long ka daw kaba long pyrshah ïa ka jylla.
Ka Commission ka la buh ka jingmudui ha kaba ïadei bad ka jingpyllait khubor ba la pynkynriah ïa ki longïing jong ki Kuki na Imphal.
Ka sorkar Manipur ka la pynkynriah noh ïa ka longïing kaba khatduh jong ki 10 tylli ki longïing jong ki Kuki kaba kynthup ïa 24 ngut ki dkhot na ka thaiñ New Lambulane ha Manipur ha kaba ki la shong la sah da ki phew snem ha kaba kim pat shah pynkynriah shano shano ruh wat hadien ba la jia ka jingïakynad kaba jur ha Manipur kaba la neh lajan saw bnai.
Ïa kine ki longïing la rah sha ka jaka ba ju shong shnong ki Kuki kaba don ha Kangpokpi distrik ha ka bynta kaba shaphang Shatei jong ka them Imphal ha ka step jong ka sngi Saitjaiñ jong ka taïew ba la lah, naba la ong ba kine ki lah ban sa shah ktah jur, la ïathuh u heh pulit.
Kine ki 10 tylli ki longïing jong ki Kuki ki la shah pynkynriah sha ka jaka ba don jingshngaiñ sha Motbung, kaba don ha Kangpokpi distrik, ka jaka kaba jngai kumba 25 km na Imphal, u la ong.
Hynrei na ka jingtohkit bniah ki longïing jong ki Kuki ki la pynshisha ba ki la shah pynbor ba kin mih na ki jaka sah jong ki ha New Lambulane sha Motbung.
Ha kaba ïadei bad ka shithi ba la phah la kyntu, ïa u Commissioner (Home), ka sorkar Manipur ba kin hukum ïa u DGP ka Manipur ba kin ai ka jingïada kaba kyrpang ïa ka jaka ba don ki longïing jong ki Kuki, kumba la pynshisha ba ki la shah pynkynriah da ka bor na Imphal.
