Ranchi, Nailur:
Kumba la ïohlum jingkheiñ na ka tnat School Education and Literacy Department, la ong ba ki la don palat 86,000 ngut ki khynnah ki bym leit skul shuh ha baroh kawei ka jylla Jharkhand ha kaba ka la paw ba ka Dumka ka la don bun tam ïa ki khynnah kiba la pep skul ha kaba ka la don kumba 15, 249 ngut.
Na ki 86,636 ngut ki khynnah skul ki bym leit skul shuh, 66,568 ngut ki dei kiba don ha ka kyrdan Primary katba 20,068 ngut ha ka Secondary.
Kumba la ïathuh da ki heh ba dei khmih, la ong ba katkum ka jingïohlum jingtip na ki distrik, la paw ba ka Dumka ka la don bun ïa kum kine ki khynnah skul ha kaba ka la don 15,249 ngut, katba ka Koderma ka la don 183 ngut ki khynnah ki bym leit skul shuh.
Kum shi bynta ban khmih bniah halor kane ka jinglong jingman, ka sorkar jylla ka la hukum ïa ki heh ba dei khmih ba kin wad ïa ka jingtip kaba bniah shaphang kito ki khynnah kiba la pynrung kyrteng ha ki skul.
“Nga la hukum ïa ki heh ba dei khmih ba kin pynlong ïa ka jingwad bniah ban ithuh bad shem ïa kum kine ki khynnah bad ban pynrung kyrteng biang ïa ki ha ki skul,” la ong u Education Secretary u K Ravi Kumar.
U la kwah ban tip kham bniah ha kano ka rukom ki khynnah ki dang pep skul wat lada ki la don ki jingpyntreikam kiba tikna ban pynlong ha ka ban khmih bniah ban pyntikna ba baroh ki khynnah ha baroh kawei ka jylla kin shah pynrung kyrteng ha ki skul.
U Education Secretary u la bthah ruh ïa ki heh ba dei khmih ba ki la dei ban pyntikna ba baroh kine ki khynnah ki la dei ban shah pynrung kyrteng haduh ka 30 tarik, Nailar bad ban hukum ïa ki nonghikai, ki kynhun nongpynïaid skul, bad ka Child Parliament ba kin ai ka jingkyrshan na ka bynta jong ki.
Ki nonghikai ki la shah bthah ba kin leit jngoh shaman ki thliew ïing jong kine ki khynnah shwa bad hadien ki kynta ba ju pynlong skul bad ban ïaleh ban pynrung kyrteng ïa ki ha ki skul, u la ong.
Kumba la ïathuh, la ong ba kum shi bynta ban kham pynduna ïa ka jingpep skul shipor jong ki khynnah ha ka jylla, ka School Education and Literacy Department ka la dep ban ïakren lypa bad bynshet ha ki nonghikai kino kiba la dei ban leit ïakynduh markhmat bad ki khynnah kiba la pep skul shiteng por bad ban pyntikna ba kine ki la dei ban shah pynrung kyrteng biang ha ki skul ba marjan.
Ïa kane ka rai la shim ban pyntikna ha ka ban pynïoh da 100 per cent ka jingpynrung kyrteng jong ki khynnah ha ki skul ha baroh ki skul hadien ba la shem ba ka jingpep skul shiteng por jong ki khynnah ka la jur bha ha ka jylla kumba la khmih bniah na ki kaiphot ba la wan na ki distrik.
Ban pynurlong ïa kane, ha kaba ïadei bad ka ‘Prayas’ ïa kaba la shim hashwa na ka bynta ban pyntikna ha ka ban pynïoh 100 per cent ka jingpynrung kyrteng ïa ki khynnah kiba la pep skul shiteng por, la pyntreikam bad pynkhie-im biang. Baroh ki skul ki la shah bthah ba ki la dei ban pynlong ïa ki jingïalap paidbah ban kyntu ba ym dei ban don iwei ruh i khynnah i ban pep skul shiteng por ne ban don ki bym leit skul.
