Shillong, Nailur 10
Ka West Khasi Hills District Cricket Association ka la khur ïa ka jingjop kaba heh, kata da 127 run ha ka jingïakhun pyrshah ïa ka West Jaiñtia Hills DCA. Kane ka la wan urlong lyngba ka jinglah ka Dubleen Nengnong ban tied marwei haduh 87 run ha ka lympung Meghalaya Cricket Association’s U-19 Girls Inter District Cricket Tournament kaba la long ha ka sngi Saitjaiñ.
Ha kawei pat ka jingïalehkai kaba itynnad bad ïakhaid bha, ka Tura DCA ka la jop da 9 run ha ka jingïakhun pyrshah ïa ka East Garo Hills DCA.
Haba phai sha ka jingïalehkai jong ka Zone 1 ha ka Group-B, ka WKH kaba la jop ïa ka jingkynting pisa ka la kam trai ban tied nyngkong ha ka jingïakhun kaba la long ha madan Umbuda, Ri-Bhoi, bad kamai 163 run na ki 19 over bad hap tang shi wiket.
Ka Dubleen Nengnong kaba la khur ïa ka nam ‘Player of the Match’ ka la tied haduh 16 tylli ki saw run ban kamai haduh 87 run na ki 73 tylli ki bol, shwa ba kan duh noh ïa ka wiket lajong ha ka over kaba khatduh.
Haba beh ïa kane ka thong kaba heh, ki nong-tied ka WJH kim shym la lah ban shan ha ki nongkawang bol ka WKH ha kaba ki la kamai tang 36 run bad hap lut baroh ki wiket bad dei tang Jinghaihun Ksoo kaba la tied 10 run. Ka Emisakani Warjri bad ka Fenny Nongrum ki la long ki nongkawang bol kiba tbit bha, ha kaba ka Emisakani ka la khur 4 wiket bad ai tang 4 run bad ka Fenny ka la khur 3 wiket bad ai tang 3 run.
Haba phai pat sha ka jingïalehkai jong ka Zone 2 ha Salpara, North Garo Hills, ka Tura kaba la jop ka jingkynting pisa ka la kam trai ban tied nyngkong hynrei na ki 25 over ki la lah ban kamai tang 94 run bad hap 3 wiket. Ka Pillika R Marak ka la tied 25 run, ka Mikchi-kime ka la tied 19 run bad ka Cheriksa S Sangma ka la tied 15 run. Katba ka Kambesa A Sangma, Seng gamchi N Sangma bad ka Tangsilchi G Momin ki la ïoh ban khur mar shi wiket.
Haba beh ïa kane ka thong, ka EGH ka la jan poi sha ka jingjop hadien ba ka la khur ei haduh 42 run (extra) khlem da donkam trei shitom bad ka 19 run ba la tied da ka Silkamchi Marak hynrei namar ka jinghap wiket kloi, ka la pynlong ïa ka EGH ban duna noh da 9 run. Baroh ki nongkawang bol ka Tura ki la ïoh khur wiket ha kane ka jingïalehkai.
Ki jingïalehkai ban long ha ka sngi Nyng-kong, ha Zone 1 Group B, ka WJH kan ïakhun pyrshah ïa ka Shillong Cricket Association, katba ka South Garo Hills DCA pat kan ïakhun pyrshah ïa ka North Garo Hills DCA ha ka Zone 2.
