Hyderabad, Nailur:
Naba ka Bharatiya Janata Party (BJP) ka la pynkhreh na ka bynta ka jingjied ïa ki kyrtong na ka bynta ban pynïakhun ha ka ilekshon Assembly ka ban sa long ha Telangana, ka jingïakmen ïasngewbha bad ïasngewthuh jingmut hapdeng ki nongïalam bad ki nongbud jong ka seng ka la jah, la ïathuh u heh nongïalam jong ka seng.
Ka seng BJP, ïa kaba la shah ñiew ba ka la long ka seng kaba hakhmat duh ban jop ha ka ilekshon ha Telangana bad kaba la paw ba kan sa wan hakhmat jong ka seng Congress ha ka jingïakhun pyrshah ïa ka seng kaba bat ïa ka jingsynshar ha ka jylla ka Bharat Rashtra Samithi (BRS) ba la lamkhmat da u Myntri Rangbah u K Chandrasekhar Rao, ka la sahdien naba haduh mynta kam pat lah ban jied ïa ki kyrtong ki ban long ki nongïakhun ha ka ilekshon, hynrei kaba dang ïaleh ban pynkhlaiñ ïa ki nongïalam bad ki dkhot ka seng na ka bynta ka jingïakhun.
“Ka la don por sa tang lai bnai na ka bynta ka jingpynkhreh ïa ka ilekshon Assembly bad ka la dei ka por na ka bynta ka seng kumba la khmih lynti ba kan leit sha ki heh nongïalam jong ka seng na ka bynta ban pynkhlaiñ ha kaba ïadei bad ki jingpynlong ïa ki jingïalang paidbah bad ki jingïalang na ka bynta ban pynïaid ïa ki kam ha ki jaka thep vote. Hynrei ha kaba ïadei bad kane ka bynta, ki heh nongïalam jong ka seng kim pat long kiba la khreh na ka bynta ban leh ïa kine ki kam,” la ong u nongïalam jong ka seng BJP.
Ka seng BRS ka la dep ban jied lypa ïa ki kyrteng na ka bynta ban ïakhun ha ki 115 tylli na ki 119 tylli ki Assembly konstitwensi ha ka 21 tarik, Nailar.
Ha kaba ïadei bad ka seng Congress ruh, ka la dep lypa ban jied ïa ki kyrteng jong ki kyrtong bad kaba dang sah ka long sa tang ban ai ïa ka rai kaba khatduh ha kaba ïadei bad ka thup kyrteng kaba nyngkong jong ki kyrtong ki ban ïakhun ha ka ilekshon, ha kaba la ong ba ïa kane yn sa pyllait hadien ba la dep ban pynlong ïa ka jingïalang jong ka Congress Working Committee ka ban sa long ha ka 16 tarik bad ka 17 tarik, Nailur ha Hyderabad.
