Srinagar, Nailur:
Da ki spah ngut ki lehnoh na Jammu & Kashmir kiba la ïoh jaka rieh ha ki bynta jong ka Pakistan-occupied Kashmir ha ki snem ba la leit ki lah ban duh syndon ïa ki jingdon jingem jong ki hadien ba ki bor sorkar jong ka J&K ki la sdang ban pyntreikam halor ka jingñiew ïa ki kum ki nongpyrshah jong ka ri bad sdang ban kurup ïa ki jingdon jingem jong ki.
“Ki kynhun ba dei khmih bniah…ki la ong ba ki briew kiba la shong la sah ha Pakistan hadien ba ki la leh bad donkti ha ki kam pyntriem jong ki lehnoh (ha India) mynta ki la sdang ban pynjur ïa ki kam pyntriem na katei ka ri,” la ong u Dilbag Singh, uba long u Director-General jong ki pulit ka J&K.
U heh pulit u la ong ba kane ka jingpyntreikam ka la sdang ha Doda distrik, ha kaba ki la ong ba 16 ngut ki nongshong shnong kiba la pynlong jaka riehtngen ha PoK ki la shahñiew kum ki nongpyrshah jong ka ri. “Khyndiat sngi hadien kane, ha Doda, ka jingpyntreikam ka la long don ïa kitei ki nongleh pyrshah. Ïa ki jingdon jingem jong ki la kurup noh bad ki la shahñiew ba ki long ki briew kiba la phet rieh na ki kti jong ka aiñ shabar ri,” la ong u Singh.
Ka kynhun wad bniah jong ki pulit ka J&K ki la dep ban pynkhreh lypa ïa ka thup jong palat 4,200 ngut kiba kum kine ki briew, ha kaba bun na ki ki dei kiba la riehtngen ha PoK naduh u snem 1990.
