Shillong, Nailur 11
Ka jingïalang ban ïakren halor ka jingpynkhreh ïa ka 2nd Sohra Interna-tional Half Marathon 2023 ka la long kaba ïaid beit ha ka lah sngi U Blei ha conference hall jong ka shlem treikam SDO (Civil) Sohra Civil Sub-Division.
Ïa ka jingïalang la pynïaid da Kong J. Umdor, EAC, Sohra Civil Sub-Division ha ka por 11.30 mynstep ha ka jingïadon lang ryngkat u Bah John F. Kharshiing, Working President ka Meghalaya State Olympic Association (MSOA), bad u Bah Finely .L Pariat, General Secretary MSOA & Meghalaya Athletic Association (MAA) kiba la batai bniah halor ki jingpynkhreh.
Ha katei ka jingïalang kaba nyngkong la long bad ki Rangbah Shnong, ki Sordar, Sirdar kiba ïadei ha ka lynti surok mareh na ka bynta ka Sohra International Half Mara-thon na Laitsohpliah shaduh Mawsmai (21km) kaba long kajuh ka lynti ïaid kumba la mareh bad ïaid mynshem snem.
Ha katei ka jingïalang la ïadon lang ki ophisar na ka tnad PWD, Health, Education, Tourism, kynthup ki nongïalam jong ki skul kiba kynthup ïa ki Principal ka sor Sohra bad kiwei kiwei.
Kane ka long ka jingïa-lang kaba lai ba la ïakynduh hapdeng ki dkhot na ka organising committee bad ka shlem treikam jong ka SDO (Civil) Sohra ban ïasyllok kumno ban nang-kyntiew ïa kane ka 2nd Sohra International Half Marathon 2023 ka ban long ha ka 30 tarik mynta u bnai kaba dei ka jingmareh kaba la mynjur bad ka ban pynïaid (technical) na ka Athletic Federation of India kaba dei ka Athletic Federation kaba ha Khlieh duh.
La ïakren bniah halor ki jingpynkhreh khamtam halor ka jingdonkam ban pynshai paidbah halor ka jingkhang ïa kane ka surok lai kynta mynstep naduh 6 baje haduh 9 baje mynstep ha ka 30 tarik.
Ka jingïalang ka la rai ban pynlong da ki jingpyrta shnong bad ban phah jingtip sha katba lah sha baroh kiba la ban mih kam ha katei ka sngi khnang ba kin sngewthuh ïa ka por lait kali khamtam ïa ki tourist bad kiba beh ïa ki jingsumar lane ki kam kyrkieh.
Namar ka jingjop jong ka jingïamareh kaba nyngkong kaba la long mynshym snem bad katkum ka jingtip na kiba la register online la khmih lynti ba ha kane ka kynti ka jingïashim bynta jong ki nongmareh kin nang bun na kylleng sha kane ka jingmareh international kaba ar.
