Khliehriat, Nailur 11
Ka Jalyiah UTD ka la kiew sha ka kyrdan First Division hadien ka jinglah ban ïalehkai bha ha kane ka aïom Second Division Football Tournament ba la pynïaid da ka East Jaiñtia Hills District Football Association (EJHDFA).
Ïa kane jingkiew kyrdan jong ka la pynskhem hadien ba ka ïoh jingjop ha ka jingïakhun quarter final kaba la long ha madan Artificial Turf kaba don ha Diengshynrum, Khliehriat ha ka lah sngi U Blei.
Ka Jalyiah UTD ha ka jing-iakhun quarter final kaba khatduh, ka la pynliem ïa ka Ladrymbai Dongwah SC da 4-1 kol ba ka wan lyngba ka jingïashut tie-breaker hadien ba ka por ban ïalehkai ka la kut da ka jingïakhaid mar 1-1 kol.
Ïa ka kol jong ka Jalayiah UTD la thep da u Sankhlur Phawa ha ka minit kaba 14, katba na ka Ladrymbai Dongwah la thep da u Promi Tariang ha ka minit kaba 69.
Da kane ka jingjop ka Jalayiah UTD ka la jam sha ka semi final.
