Guwahati, Nailur:
Ki pulit jong ka Guwahati ki la ïoh ban kurup ïa kumba 198 tylli ki synduk sabon kiba don ïa u drok Heroin uba don ka jingkhia 2.527 kilo ha ka thaiñ Jorabat, ha ki bynta ba marjan jong ka Guwahati, ha ka miet jong ka sngi U Blei bad ïoh ban kem ïa lai ngut ki briew, la ong ki pulit. Ïa ka jingleit khynra drok la pynlong ha ka por ba la ïoh ïa ka khubor halor kane ka jingdon jong ki nongkhaïi drok. Ïa ki briew kiba la shahkem la tip kyrteng kum u Md Amir Khan, Md Yakup, bad u Md Jamir, kine baroh ki dei ki nongshong shnong jong ka Manipur.
U Diganta Borah, uba long u Commissioner of Police, jong ka Guwahati, u la ong, “Ïa ka jingleit khynra la pynlong hadien ba la ïoh jingtip kaba buhrieh halor ka jingdon jong kine ki briew bad na kane ka jingpyntreikam la ïoh ban kurup ïa 198 tylli ki synduk sabon ba la don ïa u drok uba la kot sha ka jingkhia kaba 2.527 kilo ha kaba la antad ba ka dor jong u ka la long kumba T. 21 klur.” “Ngi la ïoh ban kem ïa lai ngut ki briew ïa kiba la tip kyrteng kum u Md. Amir Khan, Md. Yakup bad u Md. Jamir. Kine baroh ki dei na Manipur,” la ong u Diganta Borah.
