Shillong, Nailur 11
Ka jingïaid lynti ka kynhun ki ‘thei ïalehkai ka Jylla ha ka lympung ïalehkai Hero Sub Junior Girls’ National Football Championship 2023-24 (Tier 1) ka la poi sha kaba kut hadien ba mad ïa ka jingshah rem.
Kane ka kynhun hapoh ka jingïalam ka Kong Ïaikyntiew Nongkynrih (coach) ka la shah rem noh da 1-2 kol ha ka Jharkhand ha ka lah sngi U Blei ha Amritsar, Punjab bad ka la duh noh ïa ka lad ban jam sha ka final jong kane ka lympung.
Kumba ka paw na kane ka jingïakhun ka la long kaba ïakhaid bha ha kaba ka kynhun ki ‘thei ïalehkai ka Jylla ka la pyrshang ban ïalehkai bha naduh kaba sdang. Hadien shiteng kynta ba ka Meghalaya ka la ïoh ban pynkhih jar nyngkong eh lyngba ka Larihun Songthiang ha ka minit kaba 37 na ka bynta ban tam shi kol haduh kaba kut jong ka kylla step.
Hadien katto katne por ba la bteng ïa ka jingïakhun jong ka kylla miet ba ka Jharkhand ka la lah ban pynphai kylla shi kol lyngba ka Anushka Kumari ha ka minit kaba 57. Kane ka kynhun ka la pynbud ïa ka kol kaba ar hashwa ban kut ka jingïalehkai lyngba ka Beena Kumari ha ka minit kaba 87 na ka bynta ban khur syndon ïa ka jingjop.
Lyngba kane ka jingjop, ka Jharkhand kan ïakynduh final pyrshah ïa ka West Bengal, kaba la jop da 6-1 kol ïa ka Mizoram ha kawei pat ka jingïakhun semi final kaba ar.
