Jammu, Nailur:
Kawei ka longïing kaba don ha Kathua jong ka Jammu & Kashmir ka la kynnoh ba ki pulit jong ka Punjab ki la rung jubor hapoh ka ïingsah jong ki. Kumba la pynshisha la ong ba kane ka jingjia ka la jia ha ka sngi U Blei ha kaba kane ka longïing ka la kynnoh ba ki pulit ki la rung jubor hapoh ïing bad leh tohmet ïa ki dkhot jong ka longïing khlem jingsalia.
Ha kaba ïadei bad ka jingkynnoh ki heh pulit ka jylla ki la khmih bniah halor ka jingjia bad sdang ban pynlong ïa ka jingtohkit hadien ba ki dkhot jong kane ka longïing ka la leit ban ïakynduh ïa u Senior Superintendent of Police, jong ka Kathua, u Shivdeep Singh bad ïathuh bniah ha u shaphang ka jingjia, la ïathuh ki heh pulit.
Kumba la ïathuh la ong ba u khliehduh jong ka longïing u Rajesh Kumar, u la ong ba ka kynhun jong ki lai ngut ki dkhot jong ki pulit ka Punjab ba la lamkhmat da u Assistant Sub-Inspector ki la rung jubor hapoh kane ka ïing kaba don ha ka shnong Tafar Sangi ha ka por 3 mynstep bad sdang ban leh donbor pyrshah ïa ki dkhot ka longïing khlem daw.
U Kumar u la pynshisha da kaba ong ba ka longïing jong u ka don ïa ka Tractor Trolley kaba la treikam hapdeng ka Kathua bad ka Punjab bad ki pulit na ka jylla ba marjan ki la dawa pisa na u na ka bynta kane.
U la ong ba katba kane ka longïing ka dang shah leh donbor ha u ASI, arngut ki pulit kiba kham hapoh jong u ki la phet bad ki la wanphai bad ka kynhun jong ki Commando ha kaba ki la ïalam noh ïa u heh pulit.
Kham hadien, ka longïing ha ryngkat ka jingsynranlang jong katto katne ngut ki para marjan, ki la leit sha ka jaka sah jong u SSP Kathua bad ïathuh ha u shaphang baroh kaba la jia.
U Kumar u la dawa ruh ba la dei ban pynbiang ka kynhun pahara ban buh jingshngaiñ na ka bynta ka longïing jong u halor ka jingshah leh donbor ha ki pulit ka Punjab, la ïathuh ki pulit ka jylla.
Ar ngut ki pulit na ka jaka treikam ki pulit ki la leit jurip bniah ïa katei ka jaka ba lajia ka jingjia bad ki la rah ïa ki tiar ba ki la lap na katei ka ïing, kynthup ka jaiñspong ïa kaba la ieh da ki pulit, la ïathuh ki heh pulit.
